Løfteplattform kan vere aktuelt for deg som

• har vanskar med å kome inn og ut av boligen
• har vanskar med å kome deg mellom etasjar i boligen for å få tilgang til nødvendige rom
• ikkje kan forflytte deg på ein trygg måte mellom rullestol og trappeheis med sete

Nødvendige rom er soverom, stue, bad og kjøkken.

Generelle vilkår:

• Du må ha behov for hjelpemiddelet på grunn av vanskar med bevegelse.
• Funksjonsvansken må vere varig. Med varig meiner vi at vanskane varar i meir enn to år.
• Hjelpemiddelet skal kompensere for funksjonstapet, og bidra til at du blir meir sjølvstendig i kvardagen.
• Du må være medlem i folketrygda.

Dersom du har vanskar med å kome deg mellom etasjar og over nivåforskjellar, kan det vere aktuelt med ein løfteplattform.

Ein løfteplattform kan monterast både inne og ute.

Utandørs er plattformen utan sjakt, og kan vere eit alternativ til rampe.

Innandørs kan løfteplattformen monterast med og utan sjakt. Løfteplattform utan sjakt kjem i ulike utgåver for å utjamne mindre nivåforskjellar. For nivårforskjellar større enn ein meter, nyttast løfteplattform med sjakt, også kalt sjaktheis. Den skil seg frå vanleg heis ved at ein må halde inne ein knapp heile tida under forflytning.

Det er to typer sjaktheis:

• Heil sjakt der dører og sjaktveggar har full høgde i alle etasjar.
• Halv sjakt der dører og veggar er 130 cm høge på øvste etasje. Halv sjakt har maksimal løftehøgde på tre meter.

Om du har løfteplattform med sjakt må du ha tilknytning til alarmsentral. Dette må du dekke sjølv. 

Ved installasjon av løfteplattform i sjakt, kan det oppstå bygningsmessige kostnadar, mellom anna må det lagast hol i etasjeskiljer, leggjast fundament, byggjast om eller leggjast varmekablar. Slike kostnadar må du dekke sjølv. 

Du kan lese meir om adkomst til og i bolig på kunnskapsbanken.net.

Eit alternativ til løfteplattform med sjakt kan vere trappeheis med plattform. Dette er skildra nærare på sida om Trappeheis. 

Ein ulempe med løfteplattformen er at inngrepa som krevjast kan redusere verdien av bustaden. Dersom du ønskjer ei meir varig tilrettelegging av bustaden, kan du vurdere å søke tilskot til ombygging i staden for rampe, heis eller løfteplattform.

Viss du har hatt reiseutgifter på grunn av utprøving av hjelpemiddel, kan du søke om å få dekka reiseutgifter.

For refusjon av reiser til sjukehus og andre tenester som helseforetaka administrerar, søker du på pasientreiser.no.

Ta kontakt med kommunehelsetenesta i kommunen du bur i viss du har behov for hjelpemiddel til bustaden din. Dei vil kartlegge kva slags utstyr du treng og har best nytte av, ut frå funksjonsevnen, omgjevnadene og bustaden.

Dei vil også utforme søknaden for deg.

Det er viktig å vere klar over at fastmontering av hjelpemiddel kan innebere andre bygningsmessige utgifter. Desse dekker ikkje Nav, men du kan undersøke om det er mogleg å søke tilskot i kommunen du bur i. Slike tilskot vurderer ein vanlegvis opp mot kva økonomisk situasjon du er i.

Dersom du skal søke om innvendig løfteplattform i sjakt, bør du finne fram aktuelle planteikningar.

Du bør få hjelp av kommunal hjelpemiddelformidler til å dokumentere noverande løysing med bilete og mål.

Det kan ofte vere ein fordel å engasjere arkitekt til planarbeidet, men kontakt først kommunen for å få avdekka behova. Store sakar krev ofte både byggmeister, murar og elektrikar.

Kommunen kan også hjelpe med søknad om behovsprøvd tilskot for å dekke deler av arkitektkostnadar.

Ein hjelpemiddelformidlar utformar søknaden på dine vegne. Kontakt kommunen du bur i for å få hjelp.

Du kan la ein fagperson (for eksempel kommunal hjelpemiddelformidlar eller ergoterapeut) få fullmakt til å fylle ut og sende inn søknaden på dine vegner. Da vil signaturen din på dette skjemaet erstatte signaturen på sjølve søknadsskjemaet.

Ved søknad om fastmonterte hjelpemiddel, må du signere godkjenningsskjemaet i tillegg til søknadsskjemaet eller eit fullmaktsskjema.

Er du fagperson?

Vi har eigne løysingar for deg:

Du får skriftleg vedtak når Nav har behandla søknaden din.

Når Nav hjelpemiddelsentral fattar vedtak, bestiller vi prosjektering frå leverandør.

Nav hjelpemiddelsentral, kommune og leverandør, samarbeider med deg om å finne ei løysing som passar for deg i bustaden din.

Nav hjelpemiddelsentral får eit pristilbod frå leverandøren, godkjenner dette og bestiller hjelpemiddelet.

Dokumentasjon og eventuelle bygningsmessige endringar, må du ta deg av sjølv.

Leverandør avtaler tidspunkt for levering og montering med deg. Leverandør skal gje deg opplæring ved overlevering. Dersom du treng meir opplæring må du kontakte kommunen.

Det er ditt eller huseigar sitt ansvar å ta vare på utstyr eller bygningselement som vert demontert.

Leverandøren skal informere deg om kva du eventuelt må gjere i forkant av montering.

Ved prosjektering er det viktig at du eller huseigar opplyser heisleverandør om høve som angår installasjonen. Dette kan for eksempel vere varmekablar i trappetrinn eller gulv.

Får du avslag på søknaden din, kan du klage til Nav hjelpemiddelsentral. Du må ha sendt ein søknad som er blitt handsama for å kunne klage. Du kan ikkje klage på munnleg avslag.

Klage på vedtak

I vedtaket står det korleis du skal gå fram viss du skal klage, kven du skal klage til og klagefrist.

Anke vedtak

Viss du har fått eit vedtak frå Nav klageinstans som du meiner er feil, kan du med nokon unnatak anke. I vedtaket kan du lese om fristen for å anke.

Du kan også bruke advokat eller gje fullmakt til ein person som klagar på dine vegner.

Gi Nav hjelpemiddelsentral eller kommunen beskjed dersom det skjer endringar i livet ditt som vi bør vite om. Det kan for eksempel vere om du flytter, både internt i kommunen eller fylket, ut av landet eller på institusjon.

Dersom Nav skal flytte fastmontert utstyr, for eksempel fordi du flytter eller bytter skule, bør du starte prosessen i god tid. Ta kontakt med kommunal terapeut for mellom anna å få kartlagt nytt rom, vurdert om det må søkjast nytt utstyr og underskrift av huseigar.

Dersom du ikkje lenger skal bruke hjelpemiddelet, skal du levere det tilbake. Kommunen kan hjelpe deg med dette.

Du har sjølv ansvar for testing, reingjering og enkelt vedlikehald av  hjelpemidla dine. 

Dersom hjelpemiddelet går i stykker, tek du kontakt med teknikar i kommunen du bur i. Reparasjonar må utførast av fagfolk.

Nav har ansvar for periodisk ettersyn, og dekker utgifter til reparasjon.

Ta først kontakt med kommunen.

Utanom opningstid og ved akutte behov, kan du ringe Nav hjelpemiddelsentral sin servicetelefon for reparasjon av hjelpemiddel:

• Telefonnummer: 917 81 122
• Opningstid kvardagar: klokka 15:30–24:00
• Opningstid helger og heilagdagar: klokka 08:00–24:00.

Når du ringer Servicetelefonen vil du kome i kontakt med ein av våre teknikarar. Dei vil vurdere situasjonen ut frå situasjonsskildringa di, og avtale med deg kva som skal gjerast vidare.

Viss du ikkje skal bruke hjelpemiddelet lenger, skal du levere det tilbake. Ta kontakt med kommunen eller Nav hjelpemiddelsentral for å få hjelp til demontering.

Fastmonterte hjelpemiddel kan ikkje byttast som andre hjelpemiddel. Det er behov for ny søknad med nye mål og signaturar dersom du treng noko nytt. Dette har samanheng med at regelverk og sortiment kan ha endra seg sidan forrige gong du søkte.