For å få pleiepengar gjeld alle desse punkta:

Pleiepengar blir rekna ut på same måte som sjukepengar og utgjer 100 prosent av sjukepengegrunnlaget.

Når Nav refunderer pleiepengar utbetaler vi 100 prosent av grunnlaget, som maksimalt kan vere 6 gongar grunnbeløpet (6G). Dette svarar til 780 960 kroner. Grunnlaget blir rekna om til ein dagsats ved å dele utrekna årsinntekt på 260 dagar. Dette gjeld uavhengig av kor mange arbeidsdagar arbeidstakaren har i løpet av eit år.

Døme på utrekning:
Slik reknar vi ut dagsatsen til ein arbeidstakar med gjennomsnittleg månadsinntekt på brutto 17 000 kroner dei tre siste månadane:

• Dette svarar til ei årsinntekt på 204 000 kroner
• Utrekna årsinntekt blir delt på 260
• Nav vil utbetale med ein dagsats på 785 kroner

Graderte pleiepengar

Pleiepengane kan bli gradert i 3 ulike situasjonar, dette er når

• barnet er fast og regelmessig i eit omsorgstilbod
• arbeidstakar skal jobbe i perioden med pleiepengar
• to omsorgspersonar skal dele på å pleie barnet

Av og til kan det vere ein kombinasjon av desse 3 situasjonane.

Når den tilsette avviklar ferie, har han eller ho ikkje rett til pleiepengar. Den tilsette skal sjølv informere Nav om ferien, og utbetalinga av pleiepengar vil stanse i perioden den tilsette avviklar ferie. 

Viss de har avtalt at den tilsette skal få utsetje ferien, kan Nav likevel utbetale pleiepengar. Du finn informasjon om reglane for ferie på Arbeidstilsynet sine nettsider. 

Viss barnet vart sjukt eller skada i den tilsette sin ferie, kan den tilsette søkje om pleiepengar. 

Feriepengar

Nav utbetalar feriepengar for dei fyrste 12 vekene med pleie- og opplæringspengar i kalenderåret per barn. Feriepengar utgjer 10,2% av utbetalte pleiepengar.

Feriepengane blir utbetalet i slutten av mai året etter. Viss du har forskottert løn til den tilsette og fått refusjon av pleiepengar, vil du som arbeidsgjevar også få utbetalt feriepengane som refusjon.

Du som arbeidsgjevar må sende inntektsmelding til Nav, den treng vi for å behandle søknaden om pleiepengar. 

Inntektsmelding skal ein sende så snart som mogleg etter at den tilsette har sendt inn søknaden sin, men ikkje tidlegare enn 4 veker før fyrste dag med pleiepengar.

Vi må alltid ha inntektsmelding når den tilsette

• søkjer for fyrste gong
• søkjer på nytt etter eit opphald i pleiepengane på 4 veker eller meir
• søkjer på nytt etter eit opphald på mindre enn 4 veker, og det er ei varig endring i inntekta

Viss den tilsette har søkt om pleiepengar for meir enn 14 dagar, skal du også registrere fråværet som lovfesta permisjon i A-meldinga. 

Kan eg be om stadfesting på at den tilsette får pleiepengar frå Nav?

Viss du treng ei stadfesting på at den tilsette har søkt pleiepengar, kan du be om det frå den tilsette. Den tilsette finn eigen stadfesting til arbeidsgjevar ved å logge inn på nav.no. 

Staffestinga informerer om kva periode den tilsette har søkt om pleiepengar. Den seier ikkje noko om kor mange prosent pleiepengar den tilsette søkjer, fordi pleiepengar kan også bli gradert mot omsorgstilbod, ny inntekt og anna omsorgsperson. Vi vurderer difor dette når vi behandler søknaden. 

Du kan ikkje krevje å sjå legeerklæringa som den tilsette sender inn til Nav. Dette er fordi legeerklæringa inneheld sensitive opplysningar om barnet.

Når søknaden er ferdig behandla får den tilsette eit vedtak frå Nav. Du kan ikkje krevje å få sjå vedtaket fordi det kan innehalde sensitive personopplysningar. Viss du har behov for opplysningar om saken, til dømes om kor mykje pleiepengar som er innvilga, må du ha dialog med arbeidstakaren din.

Inntektsmelding er skjema som arbeidsgjevar må sende til Nav når ein tilsett søkjer om pleiepengar. Meldinga gjev Nav informasjon som vi treng for å behandle søknaden om pleiepengar, blant anna opplysningar om inntekt og fråvær.

Inntektsmelding skal ein sende så snart som mogleg etter at den tilsette har sendt inn søknaden sin, men ikkje tidlegare enn 4 veker før fyrste dag med pleiepengar. 

Når den tilsette har sendt søknad om pleiepengar, vil du få ei oppgåve om å sende inntektsmelding på Min side - arbeidsgjevar. Dette er ei ny løysing for inntektsmelding som blei lansert 30. januar 2025. 

Viss den tilsette søkjer om pleiepengar for fleire barn, treng vi ei inntektsmelding per sak. Du kan difor få varsel om å sende inn fleire inntektsmeldingar. 

Sjølv om Nav varslar om at vi har fått ein søknad, må du som arbeidsgjevar ha dialog med den tilsette om kor lenge den tilsette skal ha permisjon. Det same gjeld dialog viss den tilsette vil kombinere pleiepengane med jobb. 

Les meir om korleis du brukar den nye inntektsmelding: 

Her finn du nyttig informasjon om korleis du fyller ut og eventuelt endrar inntektsmeldinga.

Gjeld inntektsmeldinga også for ssjølvstendig næringsdrivande/frilansarar?

Nei, denne inntektsmeldinga gjeld berre for arbeidstakarar. 

Nav har informasjon om inntekta for sjølvstendig næringsdrivande og frilansarar frå offentlege register. Vi innhentar meir informasjon viss det er naudsynt for å behandle søknaden.

Kor kan eg sjekke inntektsmeldingar eg har sendt tidlegare? 

Du kan sjekke tidlegare innsendte inntektsmeldingar der du sendte den. 

Det tyder at inntektsmeldingar som blir sendt frå Min side - Arbeidsgjevar er synlege i saksoversikta. Har du sendt via Altinn, kan du finne innsendte inntekstmeldingar i innsynstenesta til Altinn. 

Viss du ønskjer refusjon for utbetalt løn, opplyser du om dette i inntektsmeldinga. Inntektsmeldinga fungerer som refusjonskrav, og du treng ikkje fylle ut andre skjema for å få refusjon.

Må eg utbetale løn og få refusjon frå Nav?

Som arbeidsgjevar har du ikkje ei lovfesta plikt til å utbetale løn ved fråvær når den tilsette søkjer om pleiepengar. 

Om du skal betale løn til den tilsette avheng av kva slags avtale som ligg føre mellom de, til dømes ut frå ei tariffavtale. Dersom dette ikkje er regulert av ei avtale, kan du som arbeidsgjevar velje om du vil forskottere løn eller ikkje.

Du oppgjev det du har valt i inntektsmeldinga du sender til Nav. Det er viktig at du gjev beskjed til den tilsette viss du stansar utbetaling av løn.

Må arbeidsgjevar dekkje løn dei fyrste fråværsdagane?

Nei, pleiepengar kan bli innvilga frå fyrste fråværsdag. Det er altså ikkje ein arbeidsgjevarperiode som arbeidsgjevar må dekkje fyrst. 

Kva kan eg få i refusjon? 

Pleiepengane blir utrekna etter same reglar som sjukepengar. I inntektsmeldinga oppgjev du kor mykje den tilsette tenar hos de, og kor mykje de ønskjer refundert. Les meir om utrekning av pleiepengar her.

Når vi har rekna ut pleiepengane til den tilsette, ser vi på kor mykje de krev refundert på grunn av utbetalt løn. Refusjonskravet blir vanlegvis dekt, så lenge det ikkje er høgare enn det den tilsette har rett til i pleiepengar.

I nokre tilfelle kan pleiepengane bli redusert slik at dei ikkje dekkjer inntektstapet fullt ut. Det kan vere fordi barnet oppheld seg i eit fast og regelmessig omsorgstilbod, fordi det ikkje er nok pleiepengar tilgjengeleg fordi ein annan omsorgsperson får pleiepengar for same barn eller fordi den tilsette har fått ei anna inntektskilde samtidig som dei får pleiepengar. Det kan også skje viss arbeidstakar har samla inntekt over 6G, og har fleire arbeidsgjevarar som krev refusjon for utbetalt løn.

Dette kan føre til at du får mindre refundert frå Nav enn du har utbetalt i løn for dagane arbeidstakaren har hatt fråvær. Du må snakke med arbeidstakar om korleis de eventuelt kan løyse dette. 

Refusjon for ein nytilsett som er i ein periode med pleiepengar

Om de har ein nytilsett som er i ein periode med pleiepengar, treng vi vanlegvis ikkje inntektsmelding. Om de skal utbetale løn til den nytilsette, må de likevel sende ei inntektsmelding frå Mi side - arbeidsgjevar på nav.no, Altinn eller frå Løns - og personalsystem. Desse kan sendast via "Opprett manuell inntektsmelding" og ein får ikkje oppgåve på desse.

• Sjekk at den tilsette er registrert i Aa-registeret før de sender inntektsmelding
• Oppgje fyrste fråværsdag de søkjer refusjon frå
• Kryss av for at de utbetalar løn og krev refusjon

Merk at pleiepengar vil behalde utrekninga frå tidlegare arbeidsforhald, dette kan påverke kor mykje Nav kan utbetale i refusjon. 

Meld frå om endringar i refusjon

Du må endre inntektsmeldinga viss

• du vil at Nav skal endre mottakar av pleiepengane
• du vil at Nav skal endre refusjonsbeløpet til dykk
• de forskotterer løn og tilsett sluttar i arbeidsforholdet. De må då leggje siste dato for refusjon lik dato de melder som siste arbeidsdag via A-meldinga.

Frist for å krevje refusjon

Nav kan som hovudregel gje refusjon av pleiepengar opptil 3 månadar før den kalendermånaden refusjonskravet blir sendt til Nav. Den tilsette har som hovudregel same frist for å sende søknad om pleiepengar til Nav. 

Pleiepengar gjev rett til lovleg fråvær frå arbeidet, og arbeidstakar skal ha permisjon etter arbeidsmiljølova §12-9.

Du kan lese meir om retten til permisjon på Arbeidstilsynet sine sider.

Her finn du regelverket for permisjon.

Korleis registrerer eg pleiepengar i A-meldinga?

Pleiepengar skal ein registrere som andre lovfesta permisjonar i A-meldinga dersom fråværet varar lenger enn 14 dagar. 

Her kan du lese meir om registrering av permisjonar i A-meldinga.

Inntektsmeldinga skal ein sende inn på Mi side – arbeidsgjevar. Viss du ikkje har fått beskjed om å sende inn inntektsmeldinga på Mi side – arbeidsgjevar, kan du framleis sende via altinn.no eller eige løns- og personalsystem.  

I nokre få tilfelle treng Nav meir dokumentasjon frå deg enn inntektsmeldinga. Du får brev frå vår saksbehandlar med informasjon om kva vi treng, viss dette er naudsynt. 

Nokre arbeidsgjevarar ønskjer også å sende anna dokumentasjon direkte til saksbehandlar. 

Dokumentasjonen kan ein sende til oss på to måtar: 

• Gi dokumentasjonen til den tilsette, som sjølv ettersender den digitalt ved å logge inn på nav.no. 
• Gå til sida for ettersending, og vel ettersend i post. Husk å notere den tilsette sitt fødsels- og personnummer når du hentar ut fyrsteside for innsending.

Viss du sender dokumentasjon på vegne av arbeidsgjevar, til dømes frå ei løningsavdeling, må du også notere organisasjonsnummer for kontakt. Det er fordi vi sender brev digitalt, og må knytte dei til organisasjonsnummer for å sende svar i Altinn.