Vestland har stor mangel på arbeidskraft, viser årets bedriftsundersøking frå Nav. Kvar fjerde arbeidsgivar har ikkje kome i mål med rekruttering. Framfor alt manglar det folk med fagbrev til helsesektoren og bygge- og anleggsbransjen.
Bedriftsundersøkinga frå Nav viser kva forventningar verksemdene har til arbeidsmarknaden det neste året. I Vestland svarte 1 100 bedrifter i privat og offentleg sektor på undersøkinga.
– Fylket vårt skil seg ut med aller størst mangel på arbeidskraft i landet. Denne tendensen har vi sett lenge, og i år manglar Vestland om lag 6 300 personar i arbeid, seier fylkesdirektør Bjarte Hysing-Olsen i Nav Vestland.
Hittil i år har Nav registrert fleire utlyste stillingar enn ledige jobbsøkarar kvar einaste månad.
Mistar arbeidskraft frå Aust-Europa
Mangelen på kvalifisert arbeidskraft er klart størst i helse- og sosialsektoren. Også innan bygg og anlegg slit verksemdene med å få tak i nok fagarbeidarar. Heile 45 prosent av verksemdene i Vestland etterspør kandidatar med fagbrev.
– Mange aktørar i bygg og anlegg har hatt tøffe tider etter den pengepolitiske innstramminga dei siste åra, samstundes som dei manglar fagfolk. Vi ser dette i samanheng med lågare tilgang på utanlandsk arbeidskraft, særleg frå Aust-Europa, seier Hysing-Olsen.
Kvalifiserer kandidatar på arbeidsplassen
Både elektrikar, tømrar og helsefagarbeidar ligg høgt på lista. Nav samarbeider med Vestland fylkeskommune og ulike bransjar om kvalifisering for å matche kandidatar som ønsker seg ut i jobb med bedrifter som treng arbeidskraft. Blant desse er Menn i helse og Fagveg.
– Bedriftsundersøkinga gir oss verdifulle tilbakemeldingar for å kunne utforme tenestene og utvikle samarbeidet med arbeidsgivarane. Samstundes må vi ta høgde for at behovet deira kan endre seg raskt på grunn av politisk og økonomisk uro i verda, seier Hysing-Olsen.
Fakta om bedriftsundersøkinga
- Nasjonal undersøking, gjennomført i februar og mars 2026
- I Vestland svarte 1 100 verksemder, som gir ein svarprosent på 73
- Bedriftene har svart på korleis dei vurderer utsiktene for 2026 når det gjeld mellom anna marknadsutsikter, resultat, investeringar og talet på tilsette
- Les meir om resultata i Vestland under «relatert innhald»
- Les den nasjonale rapporten frå bedriftsundersøkinga
For kommentar til meldinga, kontakt
Bjarte Hysing-Olsen, fylkesdirektør i Nav Vestland, 48 24 73 18
Ingunn Halvorsen, senior kommunikasjonsrådgjevar, 97 08 92 09