Sjukefråværet i Vestland gjekk litt ned og enda på 6,1 prosent i første kvartal. Det har ikkje vore så lågt sjukefråvær i fylket i 1. kvartal sidan 2021.
Det legemeldte sjukefråværet i Vestland gjekk ned frå 6,2 i første kvartal 2024 til 6,1 i same periode i 2025. Dette er på nivå med gjennomsnittet for landet.
Dei vanlegaste diagnosane var muskel- og skjelettplager med 32 prosent og psykiske lidingar med 24 prosent av fråværet.
God nyheit
Sjukmeldingar grunna luftvegssjukdom har gått opp sidan i fjor og ligg på 10,6 prosent, medan dei andre diagnosegruppene går litt ned eller ligg stabilt.
– Det har vore en del influensa og forkjølingar blant befolkninga denne vinteren, noko seinare enn vanleg. Det er ikkje så mykje å gjere med. Den gode nyheita er at det er nedgang i andre diagnosegrupper, og at sjukefråværet i Vestland no ser ut til å stabilisere seg etter å ha auka dei seinaste åra, seier fylkesdirektør Bjarte Hysing-Olsen i Nav Vestland.
Fylkesdirektøren ser optimistisk på utviklinga.
– Særskilt nedgangen i psykiske lidingar er positivt, og eit steg i riktig retning etter at denne diagnosegruppa har auka i fleire år. Eg håpar det er eit tidleg teikn på at sjukefråværet beveger seg i riktig retning, seier Hysing-Olsen.
Framleis for høgt
Totalt utgjorde fråværet i fylket over 1 million tapte dagsverk i dei første tre månadene av 2025.
– Det er viktig å understreke at sjukefråværet framleis er for høgt, og at vi som er arbeidsgivarar framleis har ein jobb å gjere for å bidra til god dialog og tilrettelegging slik at fleire kan jobbe heilt eller delvis, trass ulike plagar, seier Hysing-Olsen.
I Navs ferske omverdsanalyse blir det og peika på behovet for eit tettare samarbeid mellom helsesektoren og Nav for å bidra til at færre faller utanfor arbeidslivet.
– Eit poeng som blir nemnt i analysen er at meir koordinert innsats frå Nav og helse- og omsorgstenesta skal gi fleire med helseutfordringar tilpassa hjelp som inkluderer både arbeidsretta og helsemessig oppfølging. Det trur eg er ein nøkkel som kan bidra til endå lågare sjukefråvær, seier Hysing-Olsen.
For kommentar til meldinga, kontakt
Bjarte Hysing-Olsen, fylkesdirektør i Nav Vestland, 48 24 73 18
Birgitte B. Lygre, senior kommunikasjonsrådgjevar, 90 50 70 96
Fakta
Fakta om sjukefråværet i Vestland i første kvartal 2025
- Høgast fråvær i Askøy og Øygarden (7,3 prosent) og Alver, Fedje og Vaksdal (alle 7,1 prosent)
Lågast fråvær i Aurland (4,2 prosent) og Gloppen (4,4 prosent)
Dei vanlegaste årsakene til sjukemelding er muskel- og skjelettplager (32 prosent) og psykiske lidingar (24 prosent)
Helse- og sosialtenester har høgast sjukefråvær med 8,9 prosent
Fleire tal for sjukefråvær finst på dei nasjonale statistikksidene våre.
Eigenmeldt sjukefråvær for heile landet finn du hos Statistisk sentralbyrå.
