Det viser årets bedriftsundersøking frå Nav Vestland.

Verksemdene sine samla forventningar hald fram med å stige. Både offentlege og private bedrifter forventar stor grad av stabilitet på dei fleste områda. Om lag 950 arbeidsgivarar i Vestland svarte på undersøkinga, som blei gjort i februar og mars 2025.

– Svara i undersøkinga er bedriftene si sjølvrapporterte vurdering av eigne forventningar for 2025, seier fylkesdirektør Bjarte Hysing-Olsen i Nav Vestland.

Venta utvikling

Den mest markante endringa frå i fjor er verksemdene sitt syn på korleis dei skal klare å rekruttere kvalifisert arbeidskraft. Samanlikna med i fjor har den estimerte mangelen i Vestland auka med over 1000 arbeidarar, frå 5 640 i 2024 til 6 750 i 2025.  Vestland skil seg frå resten av landet når det gjeld desse utfordringane.

Tal for arbeidsmarknaden i april syner det same biletet. Førre månad var det nemleg 2000 fleire utlyste stillingar enn arbeidssøkarar.

– Mangelen på kvalifisert arbeidskraft er formidabel og aukande. Det er størst mangel innan helse og sosiale tenester, medan bygg og anlegg og varehandel også melder om rekrutteringsvanskar. Den store auken i talet som rapporterer at dei manglar kvalifisert arbeidskraft er eit tydeleg bevis på den utviklinga vi har snakka om i mange år allereie, seier fylkesdirektør Bjarte Hysing-Olsen i Nav Vestland.

Stor mangel på fagarbeidarar

Det er særskilt mangel på spesialiserte yrke innan handverksfag, og heile 46 prosent av verksemdene etterspør fagarbeidarar.

– Det positive er at stadig fleire verksemder tek kontakt med oss for å få til et samarbeid om kvalifisering. Vi har allereie gode samarbeid om kvalifiseringsløp innan mellom anna industri, logistikk og transport, bygg og anlegg og helse, seier Hysing-Olsen.

Mange verksemder svarar at dei ønskjer å styrke kompetansehevinga internt.

– Dei fleste ser no at det ikkje er enkelt å få ein fiks ferdig kvalifisert medarbeidar, og at eit samarbeid med Nav er ein god løysing for å få motiverte tilsette som kan få den kompetansen dei treng etter at dei er tilsett, legg Hysing-Olsen til.

Verksemdene svarte på undersøkinga i februar og mars, før uroen i marknaden som kom etter at USA varsla auke i tollsatsane.

 

For kommentar til meldinga, kontakt

Bjarte Hysing-Olsen, fylkesdirektør i Nav Vestland, 48 24 73 18

Birgitte B. Lygre, senior kommunikasjonsrådgjevar, 90 50 70 96