Tal frå Nav viser at 6 035 personar i Vestland var registrerte som heilt arbeidsledige ved utgangen av juli. Det utgjer 1,7 prosent av arbeidsstyrken, godt under gjennomsnittet for landet på 2,1 prosent.

– Arbeidsløysa har vore stabilt låg i heile år, og det er mangel på arbeidskraft i ei rekkje bransjar. Dette er godt nytt for dei som snart er klare for eit nytt skuleår eller studieløp, seier fylkesdirektør i Nav Vestland, Bjarte Hysing-Olsen.

Helsefag er mest etterspurt

Helse- og omsorgssektoren i Vestland hadde 683 utlyste stillingar i juli. I bygg og anlegg var det 420 ledige stillingar, følgt av butikk- og salsarbeid med 416 stillingar.

– Kandidatar som har valt helse og oppvekst, sjukepleie eller andre helsefag har svært gode utsikter på arbeidsmarknaden. Generelt ser vi at vidaregåande skule er nøkkelen til eit varig fotfeste i arbeidslivet, seier Hysing-Olsen.

Arbeidsløysa er dobbelt så høg blant jobbsøkarar som berre har grunnskulen, samanlikna med dei som har fullført vidaregåande, viser nasjonale tal.

Nav samarbeider med Vestland fylkeskommune om å hjelpe flest mogleg arbeidssøkarar til å skaffe seg fagbrev eller andre kvalifikasjonar til ledige jobbar.

Størst andel ledige i Fedje

Fedje kommune har høgast arbeidsløyse i Vestland med 3,7 prosent heilt ledige. Deretter følgjer Kinn med 2,3 prosent og Øygarden med 2,2 prosent. Lågast er arbeidsløysa i Modalen, Solund og Hyllestad. I desse tre kommunane er det så få ledige at Nav ikkje kan offentleggjere tala av omsyn til personvernet.

Under «Relatert innhald» finn du fleire tal frå arbeidsmarknaden i Vestland. 

Nav jobbar med å bytte ut gamle IT-system og fase inn nye. Dette har resultert i ulike brot i arbeidsløysestatistikken det siste året. Sjå Hovedtall om arbeidsmarkedet for meir informasjon.

Arbeidsmarknaden i Vestland, juli 2026

For kommentar til meldinga, kontakt 

Bjarte Hysing-Olsen, fylkesdirektør i Nav Vestland, 48 24 73 18  

Ingunn Halvorsen, senior kommunikasjonsrådgjevar, 97 08 92 09