Vestland har færre arbeidsledige enn for eit år sidan, viser tal frå Nav. Talet på ledige stillingar held seg stabilt høgt i august, og innan bygg og anlegg er det stor etterspurnad etter arbeidskraft.
Ved utgangen av august er 5 874 personar registrerte som heilt ledige i Vestland. Det er 248 færre enn på same tid i fjor. Dei heilt ledige utgjer 1,7 prosent av arbeidsstyrken i Vestland, mot 2,1 prosent på landsbasis.
– Når vi ser første halvår under eitt, er det særleg helse og undervisning som manglar arbeidskraft. I delar av fylket registrerer vi over ti ledige jobbar for kvar arbeidssøkar i helse, pleie og omsorg, seier fylkesdirektør Bjarte Hysing-Olsen i Nav Vestland.
Utanlandske fagfolk kom ikkje tilbake
Også i det private finst mange eksempel på ein stram arbeidsmarknad, det vil seie få arbeidsledige og mange utlyste jobbar.
Bygge- og anleggsbransjen i Vestland har 472 heilt ledige jobbsøkarar, ein nedgang på 15 prosent sidan august i fjor. Samstundes er det lyst ut 442 stillingar.
– Ei av årsakene kan vere at bransjen ikkje har fått tilbake utanlandsk fagkompetanse som flytta ut i kjølvatnet av renteauke og færre oppdrag. Vi veit at arbeidsinnvandrarar lettare flyttar på seg enn andre grupper av befolkninga. Betra arbeidsvilkår i andre land og ei svak norsk krone gjer det mindre attraktivt enn før å jobbe her. For oss i Nav er det difor høgt prioritert å bidra til at jobbsøkarar kvalifiserer seg til dei faga som bransjane har bruk for, seier Hysing-Olsen.
Kommunane i Vestland
Fedje kommune har høgast arbeidsløyse i Vestland med 3,7 prosent heilt ledige. Deretter følgjer Kinn med 2,2 prosent, Bremanger og Øygarden (begge med 2,1 prosent). Heile 34 kommunar i fylket har ei arbeidsløyse på under 2 prosent. Aller lågast ligg Modalen, Solund og Hyllestad.
Arbeidsmarknaden i Vestland
| August 2026 | August 2025 | |
| Heilt ledige, Vestland | 5 874 1,7 % av arbeidsstyrken | 6 122 1,8 % av arbeidsstyrken |
| Heilt ledige, Bergen | 3 192 2,0 % av arbeidsstyrken | 3 253 2,0 % av arbeidsstyrken |
| Langtidsledige, meir enn seks månader | 2 952 | 2 942 |
| Ledige under 30 år | 1 597 | 1 562 |
| Permitterte, heilt eller delvis | 475 | 360 |
| Ledige stillingar | 4 088 | 4 047 |
Under «Relatert innhald» finn du fleire tal frå arbeidsmarknaden i Vestland.
Les meir om arbeidsmarknadsstatistikk frå Nav: Hovedtall om arbeidsmarkedet
Vi har brukt kunstig intelligens (MS Copilot) i arbeidet med pressemeldinga.
For kommentar til meldinga, kontakt
Bjarte Hysing-Olsen, fylkesdirektør i Nav Vestland, 48 24 73 18
Ingunn Halvorsen, senior kommunikasjonsrådgjevar, 97 08 92 09