Utlevering og tilbakelevering av hjelpemiddel
Fast mottaksstad for levering og henting
Hjelpemiddel til brukarar vert leverte via faste mottaksstader i kommunane. Hjelpemiddel som skal leverast tilbake til NAV, skal leverast til kommunal mottaksstad.
NAV Hjelpemiddelsentral leverer og hentar hjelpemiddel etter fast køyreplan. Køyreplanen ligg på nettsidene til NAV Hjelpemiddelsentral Vestland. Endringar i planen i samband med høgtider og ferier, vert også publiserte her.
Det er mogleg å avtale levering av hjelpemiddel utanom oppsett køyreplan eller direkte frå hjelpemiddelsentralen. Den som skal hente hjelpemiddel utanom fast levering, må avtale tid og stad for henting med NAV Hjelpemiddelsentral.
Kommunal mottaksstad skal vere bemanna når hjelpemiddel vert leverte. Kommunen skal kontrollere leveransen og varsle NAV Hjelpemiddelsentral om eventuelle avvik snarast mogleg.
Dokumentasjon ved levering
I leveransen frå NAV Hjelpemiddelsentral ligg følgjesetel og to eksemplar av blankett 5.17. Kommunen skal signere følgjesetelen og sende den i retur seinast ved neste leveranse til NAV Hjelpemiddelsentral. For nokre leveransar kan følgjesetelen vere erstatta med annan dokumentasjon, til dømes skjermdump eller verkstadordre. Det er viktig at kommunen også signerer denne dokumentasjonen, og returnerer den til hjelpemiddelsentralen.
Når kommunen utleverer hjelpemiddel til ein brukar, skal brukaren signere på blankett 5.17, og behalde det eine eksemplaret av blanketten. Alle signaturar må vere leselege.
Tilbakelevering av hjelpemiddel
Hjelpemiddel skal leverast tilbake til NAV når vilkåra for utlån ikkje lenger er oppfylte. Kommunen har ansvar for at hjelpemidla vert leverte til NAV Hjelpemiddelsentral frå kommunal mottaksstad.
Døme på tilfelle der hjelpemiddel skal leverast tilbake:
- Brukaren har hatt hjelpemiddelet på utprøvingslån eller som eit tidsbestemt utlån.
- Brukaren flyttar til ein institusjon.
- Brukaren skal byte hjelpemiddel.
- Hjelpemiddelet fungerer ikkje lenger hensiktsmessig, fordi brukaren til dømes har fått endra funksjonsevne eller nyttar hjelpemiddelet på ein måte som ikkje samsvarar med opplæring og retningslinjer.
Tilbakelevering ved dødsfall
NAV Hjelpemiddelsentral sender kommunen mors-lister med oversikt over hjelpemiddel kommunen kan behalde og hjelpemiddel som må leverast inn. NAV sender også brev til buet.
Kommunen hentar inn hjelpemidla i samråd med pårørande. Dersom kommunen ikkje leverer hjelpemidla, sender NAV Hjelpemiddelsentral inntil to purringar til kommunen. Vert hjelpemidla framleis ikkje leverte, kan NAV Hjelpemiddelsentral sende kommunen erstatningskrav for hjelpemidla.
Kommunen kan søkje om å overføre fastmonterte hjelpemiddel til ny hjelpemiddelbrukar, i tilfelle der det er hensiktsmessig.
Skjema for innlevering
Kommunen fyller ut og signerer på to eksemplar av skjemaet «Innlevering av tekniske hjelpemiddel». Brukaren eller pårørande beheld eitt eksemplar av skjemaet. Det andre eksemplaret skal følgje hjelpemiddelet når det vert levert til NAV Hjelpemiddelsentral.
Hjelpemiddel som leverast tilbake skal merkast med raud lapp, slik hjelpemiddelsentralen ser ser at hjelpemiddelet ikkje er levert inn for reparasjon. Det er viktig at alt tilbehøyr, til dømes ladarar, følgjer med hjelpemiddelet.
NAV Hjelpemiddelsentral kontrollerer at opplysningane på innleveringsskjemaet er i samsvar med leveransen frå kommunal mottaksstad, og følgjer opp eventuelle avvik.
Rutine for innlevering av hjelpemiddel med smittefare
Kommunen skal melde frå til NAV Hjelpemiddelsentral Vestland når det er behov for tilbakelevering eller reparasjon av tekniske hjelpemiddel som kan innebere fare for overføring av allmennfarleg smittsam sjukdom.
Kommunehelsetenesta skal også merke hjelpemiddel som kan vere smittefarlege.
Viss eit smittefarleg hjelpemiddel skal leverast tilbake for gjenbruk, er det kommunehelsetenesta si oppgåve å desinfisere hjelpemiddelet før det vert levert til hjelpemiddelsentralen.