Kvalifiseringsprogrammet

Kvalifiseringsprogrammet (KVP) er for deg som treng  støtte for å kome i arbeid. Det er viktig at innhaldet i programmet ditt gjer at du lettare kjem i arbeid.

Du må fylle nokre krav for å vere aktuell for programmet. Du må

• vere i yrkesaktiv alder
• ha vesentleg nedsett arbeids- og inntektsevne
• ha behov for tett oppfølging
• ha ingen eller svært avgrensa pengestøtte frå NAV
• ha vore gjennom ei arbeidsevnevurdering
• ha lovleg opphald og ein fast stad å bu i Noreg (fast bustad)

Programmet ditt skal vere tilpassa deg og utfordringane dine. Kva for støtte og bistand treng du for å kome i arbeid? Saman lagar rettleiaren din og du eit program som skal innehalde arbeidsretta tiltak, opplæringsaktivitetar, individuell oppfølging og rettleiing.

Programmet kan også innehalde andre aktivitetar som støttar og førebur deg på å kome i arbeid. Det kan for eksempel vere å trene på motivasjon, norskkurs, buoppfølging og økonomiske råd og økonomisk planlegging. I programmet kan du også få tid til nødvendig helsehjelp.

Du får ansvar for å følgje opp programmet i samarbeid med rettleiarar ved NAV-kontoret.

Kvalifiseringsprogrammet er på 37,5 timar i veka.

Du får kvalifiseringsstønad når du tek del i programmet. Stønaden er 2 gonger grunnbeløpet (G), som svarer til 222 954 kroner. Stønaden gir pensjonspoeng.

Er du under 25 år, får du 2/3 av full stønad, det svarer til 148 636 kroner.

Stønaden blir redusert dersom du har

• ugyldig fråvær
• inntekter frå arbeid eller lønn som lærling
• rett til dagpengar, sjukepengar eller foreldrepengar

Dersom du sluttar i programmet, har du ikkje rett til kvalifiseringsstønad.

Andre aktuelle stønader

Har du barn, kan du for kvart barn få eit barnetillegg på 35 kroner dagen, 5 dagar i veka.

Du kan heilt eller delvis få dekt utgifter du har i samband med arbeidsretta utgreiing eller ein aktivitet.

Du kan ha rett til økonomisk sosialhjelp dersom kvalifiseringsstønaden ikkje dekkjer nødvendige utgifter til å leve og bu.

Hvis du har egen bolig, kan du ha rett til bustøtte frå Husbanken.

Du kan få barnebidrag, barnetrygd og kontantstøtte i tillegg til kvalifiseringsstønaden.

Du har rett til opptil 25 feriedagar for kvart kalenderår. Er du over 60 år, har du rett til fri 5 ekstra dagar per år.

Det er ikkje feriepengar på denne stønaden. 

Du har rett til kvalifiseringsstønad i ferien.

Saman med rettleiaren din og arbeidsplassen/tiltaksarrangøren blir de einige om når du skal ta ut feriedagane dine.

Kvalifiseringsprogrammet varer i inntil 1 år om gongen.

Programmet kan bli forlengt med 1 år dersom du og rettleiaren din finn ut at det er nødvendig. I enkelte tilfelle kan programmet bli forlengt med enda et år.

Utbetalingsdatoane varierer frå kommune til kommune. I vedtaksbrevet du får frå NAV, står det informasjon om utbetalingar.

Dersom utbetalingsdatoen er i ei helg eller på ein heilagdag, får du vanlegvis pengane dagen før.

Skattetrekk

Det blir trekt skatt av pengane.

Det blir ikkje trekt skatt i juni. I desember blir det trekt halv skatt.

Viss du betaler Svalbardskatt eller kjeldeskatt, er det ordinært skattetrekk i juni og desember.

Meir om skattetrekk på utbetalingar frå NAV. 

Ta kontakt med NAV-kontoret ditt for å finne ut om programmet kan vere noko for deg.

Finn ditt NAV-kontor