Viss det er naudsynt med opplæring for å ta deg av barn med funksjonshemming eller langvarig sjukdom, kan du ha rett til opplæringspengar. Det kan også bli gjeve opplæringspengar etter at barnet har fylt 18 år.

Langvarig sjukdom vil seie at barnet er forventa å vere sjuk i minst eit år frå sjukdomen blir stadfesta. Du kan også få opplæringspengar viss barnet ditt har utviklings- eller åtferdsforstyrring, slik som autisme, asperger og ADHD. 

Opplæringa må vere naudsynt for at du skal kunne ha omsorg for barnet, og dette må bli dokumentert frå lege. 

Kven kan få opplæringspengar?

Fleire omsorgspersonar kan få opplæringspengar samstundes når dette er naudsynt for å kunne ta seg av barnet. I tillegg til foreldre og steforeldre kan også andre personar ha ei klar rolle i omsorga for å ta seg av barnet, og dermed ha rett til opplæringspengar.

Støttekontaktar, avlastingsheim eller profesjonelle har ikkje rett til opplæringspengar. Det tyder at det ikkje blir gjeve opplæringspengar til å lære opp tilsette rundt barnet.

For å få opplæringspengar, må du få opplæringa på ein godkjend helseinstitusjon eller ved eit spesialpedagogisk kompetansesenter.

Opplæring ved offentlege helseinstitusjonar i kommune- eller spesialisthelseteneste kan gje rett til opplæringspengar. Det vil seie at til dømes sjukehus og BUP kan bli rekna som godkjend institusjon. Det same gjeld private helseinstitusjonar som har avtale med helseføretaka, helsesportsenter og kompetansesenter for sjeldne diagnosar.

Du kan også få opplæringspengar for foreldrekurs ved eit offentleg spesialpedagogisk kompetansesenter. Det kan til dømes vere kurs for høyrsels- og synshemma barn, kurs hos PPT og liknande. I nokre tilfelle kan også private kompetansesenter bli godkjende, viss kvaliteten er likestilt med det offentlege tilbodet.

Kva er ikkje godkjend som helseinstitusjon?

Det blir ikkje gjeve opplæringspengar viss du deltar i opplæring som blir arrangert av humanitære organisasjonar, brukarorganisasjonar eller liknande. Barne-, ungdoms- og familieetaten (Bufetat) og hjelpemiddelsentralen er andre dømer på helseinstitusjonar som ikkje er godkjende.

For å ha rett til opplæringspengar, må du ha fråvær frå jobb på grunn av opplæring slik at du mistar arbeidsinntekt. 

Det er fleire punkt som må vere oppfylt:

• Du har ei årsinntekt som er minst 68 275 kroner (halvparten av folketrygda sitt grunnbeløp).
• Arbeidstida eller inntekta di er redusert med minst 20%
• Du er under 70 år

For å ha rett til opplæringspengar, må du ha jobba minst fire veker før du startar opplæringa. 

Unntak når du ikkje har jobba fire veker

Periodar med desse pengestøttene kan vere likestilt med jobb:

• Sjukepengar
• Dagpengar
• Foreldre- og svangerskapspengar
• Pleie-, opplærings- og omsorgspengar

Det tyder at du kan ha rett til opplæringspengar viss du har fått minst éin av desse pengestøttene i løpet av dei siste fire vekene før du skal ha opplæring. 

Vi kan også gjere unntak viss du har vore i ulønt permisjon i inntil 12 månadar etter foreldrepengeperioden, eller hatt andre lovfesta permisjonar etter Arbeidsmiljølova §§12-1 til 12-5. Du må ha avtalt med arbeidsgjevar når du skal tilbake i jobb etter permisjonen. Du kan lese meir om lovfesta permisjonar på Arbeidstilsynet sine nettsider.

Viss du framleis er i permisjon når du skal på opplæring, kan opplæringspengane bli utbetalt med 65% av utrekna inntekt.

Får du arbeidsavklaringspengar?

Arbeidsavklaringspengar gjev ikkje rett til opplæringspengar. Viss du kombinerer arbeidsavklaringspengane med arbeid, kan du søkje om opplæringspengar viss du må vere borte frå jobb på grunn av naudsynt opplæring. 

Bur du i Noreg er du vanlegvis medlem av folketrygda.

Når vi får søknad frå den tilsette, vil du få varsel om å sende inntektsmelding frå Min side - arbeidsgjevar. Varselet blir sendt på e-post/SMS til dei som er registrert som varslingsmottakar i Altinn. Her kan du lese meir om kven som får tilgang til inntektsmeldinga. 

Viss den tilsette har søkt for ei periode fram i tid, får du tidlegast varsel om å sende inntektsmeldinga fire veker før fyrste fråværsdag. 

Nokre gongar kan du få varsel om å sende inntektsmelding, men seinare står oppgåva som "utgått" på Min side - arbeidsgjevar. Dette skjer som regel på grunn av endringar i saka, som gjer at vi ikkje treng inntektsmeldinga lenger. Du kan avklare med den tilsette kva som er status for søknaden.

Inntektsmeldinga foreslår ei utrekna månadsløn ut frå registrert inntekt i A-ordninga. Det er du som arbeidsgjevar som må vurdere om dette er riktig inntekt, eller om du bør korrigere den. 

Du må vanlegvis endre den foreslåtte inntekta viss: 

• den tilsette har hatt lovleg fråvær utan løn som har gjeve trekk i lønsutbetaling
• den tilsette har endra stillingsprosent
• den tilsette har hatt varig lønsendring

Viss du endrar den foreslåtte månadsløna, må du oppgje ei årsak til kvifor du endrar. Nokon av endringsårsakene krev også at du oppgjev periode for endringa, til dømes viss den tilsette har hatt ferie eller har vore permittert. 

Viss de utbetalar løn som vanleg, og krev refusjon, så informerer du om dette i inntektsmeldinga. Nav vil då utbetale stønaden direkte til dykk, basert på kontonummer dykk har registrert for utbetalingar frå Nav.

Det er viktig at de har kontakt med den tilsette om status på søknaden, og har løpande dialog om eventuelle endringar som påverkar refusjonen. Viss den tilsette melder om endringar i periode eller uttak, eller får avslag på søknaden, vil slike vedtak berre bli sendt til den tilsette.

I inntektsmeldinga kan de leggje inn periodar med ulike beløp for refusjonen. Det er aktuelt viss de betalar ulik løn i perioden, og viss de skal ha periodar med og utan refusjon. For periodar utan refusjon, skriv de inn 0,- som refusjonsbeløp. 

Du kan finne den innsendte inntektsmeldinga i saksoversikta på Min side - arbeidsgjevar. 

Når du finn inntektsmeldinga, kan du trykkje deg inn på oppgåva og velje "endre", for å korrigere opplysningane du la inn sist. Viss du har sendt inn inntektsmelding via Altinn eller løns- og personalsystem, vil du ikkje sjå opplysningane du sendte inn. Men, du kan hente opp den førehandsutfylte versjonen frå Nav, og tilpasse opplysningane i den for å sende endring. 

Endre inntekt

Viss den tilsette har ei endring i inntekta si, skal du berre endre inntekta viss den nye inntekta var aktuell ved fyrste fråværsdag. Endringar i inntekt etter denne dagen påverkar ikkje utrekninga hos Nav. Du må likevel vurdere om du vil endre i refusjonen, viss det har vore varig lønsendring. 

Endre refusjon

Merk at viss du skal gjere endringar i refusjon, må du behalde refusjonsperiodar tilbake frå fyrste fråværsdag. Viss du skal starte eller stanse refusjon, må du difor leggje dette inn som ei periode med 0,- i refusjon, framfor å velje at det ikkje er refusjon.