Florapiloten – skreddarsydd fagopplæring

Kan du tenke deg å jobbe i ei teknologi- og industribedrift? Gjennom Florapiloten kan du få ein opplæringsplan som er skreddarsydd til deg, på vegen fram til fagbrev og jobb.

Florapiloten er eit tilbod til kandidatar som ønsker å ta fagbrev med om arbeid i industri- og teknologibedrifter. Vi koplar jobbsøkarane mot bedrifter i Nordfjord og Sunnfjord som treng fagfolk.

Industriteknologi er eit VG2-kurs som dannar grunnlag for over 40 ulike fagbrev i industri- og teknologibedrifter. Desse fagbreva passer for deg som er nysgjerrig, praktisk anlagt og interessert i ny teknologi. Eksempel på fag er industrimekaniker, platefag, sveisefag, CNC-operatørfag, industrirør, produksjonsteknikkfaget. Les meir om yrka på velgteknologi.no. 

Kven kan få tilbodet? 

  • Over 19 år
  • Registrert som jobbsøkar hos NAV
  • Ønsker fagbrev og arbeid innan industri- og teknologifag
  • Ønsker å jobbe i Nordfjord eller Sunnfjord 

Slik melder du deg på

  • Logg deg inn på nav.no, start ein ny dialog og gi beskjed til rettleiaren din om at du er interessert i Florapiloten.
  • Delta på informasjonsmøte på Møteplass på Flora vidaregåande skule den 12. mars klokka 13.30-15.30. Du kan melde deg på informasjonsmøtet her. Om du ikkje har fått meldt deg på, er du også velkomen.

Slik er løpet fram mot fagbrev

  • Du startar gjerne med arbeidstrening i ei bedrift for å teste om industriteknologi er riktig for deg. NAV har avtale med bedrifter som tek imot lærlingar.
  • Når du har bestemt deg, søker du om skuleplass hos vaksenopplæringa. Her finn du informasjon om søknad og inntak.
  • Rettleiingstenesta i fylkeskommunen kartlegg kva du har av utdanning og praksis. Dei skreddarsyr ein plan som viser kva fag du treng for å få fagbrevet og korleis du får tatt dei.
  • Du får eit individuelt opplæringsløp som tek omsyn til situasjonen din. Dette er som regel ein kombinasjon av skule og praksis i bedrift. Flora vidaregåande skule tilbyr komprimert opplæring i programfaga for VG1 Teknologi- og industrifag og VG2 Industriteknologi i skuleåret 2024/2025. 
  • Bedrifta peikar ut ein fagleg ansvarleg som følger deg opp i læretida. Du får også tett oppfølging frå NAV-rettleiaren din, skulen og opplæringskontoret.
  • Etter læretida kan du gå opp til fagprøva og ta fagbrevet.

Økonomi

  • Viss du allereie får ei yting frå NAV, kan du behalde den. Viss ikkje har du rett til å søkje om tiltakspengar. Det er viktig at du og NAV-rettleiaren din saman går gjennom økonomien din og legg ein plan for heile opplæringsløpet.
  • Når du teiknar lærekontrakt med ei bedrift, vil du få lærlingløn.
  • Du kan søke støtte frå Lånekassen medan du går på skule og i læretida.
  • Du kan også ha rett på ulike tilleggsstønader, til dømes for å dekke dagleg reise til skulen eller praksisplassen.

Florapiloten er eit samarbeid mellom NAV, Vestland fylkeskommune, Pro Vestland Opplæringskontor, Opplæringskontoret for Transport og logistikk og lokale arbeidsgjevarar i Nordfjord og Sunnfjord.

Vil du vite meir?

Kontakt oss gjerne på e-post nav.kinn@nav.no