Slik gjer du det — For tiltaksarrangørar

Digital løysing for utbetalingar for tiltaksarrangørar

Her ser du korleis tiltaksarrangørar og tiltaksverksemder skal sende krav om utbetaling digitalt.

Kva kan du gjere i løysinga?

Her kan du sjå kva du som tilsett hos ein tiltaksarrangør kan gjere i løysinga

Informasjon om godkjente tilsegn finn de under fanen «Tilsagnsoversikt».

For tiltaka Arbeidsførebuande trening og Varig tilrettelagt arbeid i skjerma verksemd er det berre godkjende tilsegn med periode frå 1. juli 2025 og seinare som blir tilgjengelege i løysinga. Den digitale infoen om tilsegn vil erstatte dagens tilsegnsbrev for desse tiltaka.

Arrangørar for Avklaring, Oppfølging og Arbeidsretta rehabilitering kan sjå informasjon om godkjende tilsagn som gjeld frå 1. oktober 2025 og seinare.

Arrangørar for Digitalt jobbsøkarkurs kan sjå info om godkjende tilsegn som gjeld frå 1. november 2025 og seinare.

Arrangørar for Jobbklubb, Arbeidsmarknadsopplæring i gruppe og Fag- og yrkesopplæring i gruppe kan sjå info om godkjende tilsegn som gjeld frå 1. januar 2026 og seinare.

De skal sende inn krav om utbetalingar digitalt. Løysinga erstatter dagens refusjonskravskjema/faktura.

Slik fungerer løysinga

Tiltak med fast sats, avtalt månadspris eller avtalt vekespris

Krav om utbetaling kan sendast inn frå den 7. i månaden etter månaden utbetalinga gjeld for. Kravet blir oppretta automatisk av systemet, og de finn det under «Oversyn over innsendingar» når det er klart til innsending.

De skal sende inn eitt krav per tiltaksgjennomføring per månad. I starten av innsendinga vil de sjå informasjon om godkjende tilsegn for utbetalingsperioden.

På neste side i innsendinga blir utrekna beløp vist. Utrekninga er gjort av systemet ut frå registrert informasjon om deltakarane i deltakaroversikta.

Hugs å kontrollere opplysningane før innsending

Det er viktig at de kontrollerer at opplysningane om deltakarane er rette før de sender inn kravet. Ser de at nokre opplysningar ikkje er oppdaterte, må de sende framlegg om endring til Nav-rettleiaren via deltakaroversikta. Det ligg lenkje til deltakaroversikta i innsendinga.

Opplysningar som blir endra av Nav-rettleiaren fører til at utrekninga blir oppdatert, så lenge det skjer før kravet blir sendt inn.

Ligg det framlegg om endring til behandling hos Nav som kan påverke utrekninga, er det ikkje mogleg å sende inn kravet. Kravet kan først sendast inn når alle framlegg er ferdig handsama av Nav-rettleiaren. Dersom de opplever at det tek lang tid før Nav-rettleiaren handsamar endringsforslaga, kan de kontakte den som er ansvarleg for tiltaket for å få hjelp.

Held de stengt i verksemda og ikkje skal ha utbetaling for ein periode, må dette registrerast av Nav på førehand. Då blir det teke omsyn til i utrekninga. Ta kontakt med Nav dersom informasjon om stengt periode ikkje synest i innsendinga.

Før de sender inn kravet må de stadfeste at opplysningane i innsendinga er rette.

Tiltak med avtalt timespris eller annan avtalt pris

For tiltak med avtalt timespris skal de sende inn krav digitalt. Trykk på knappen «Opprett krav om utbetaling» og følg flyten vidare.

Nav gjer inga førehandsutrekning av beløp for tiltak med avtalt timespris. De skal laste opp vedlegg som dokumentasjon på beløpet de ønskjer utbetalt. Inforomasjon om registrerte deltakarar frå deltakaroversikta blir vist i innsendinga for å sikre at de rapporterer timar på deltakarar som er registrerte hos Nav.

Er det avtalt noko anna enn månadspris, vekespris eller timespris, skal de òg sende inn kravet digitalt via knappen «Opprett krav om utbetaling». De kan laste opp vedlegg som dokumentasjon for beløpet de ønskjer utbetalt.

Av og til gjev Nav tilsegn for oppretting av nye tiltaksplassar/investeringar for tiltaka Arbeidsførebuande trening og Varig tilrettelagt arbeid i skjerma verksemd. De vil sjå informasjon om godkjent tilsegn for investeringar i «Tilsegnsoversikta».

For å sende inn krav om utbetaling for investeringar, trykkjer de på knappen «Opprett krav om utbetaling» og følgjer flyten vidare. Før de kan sende inn kravet til Nav, må de laste opp vedlegg som dokumenterer utgiftene.

Felles for alle utbetalingar

Kontonummer for utbetaling

De får sjå registrert kontonummer hos Nav i innsendinga. Det ligg òg lenkje til staden der de kan endre det dersom det ikkje stemmer. Det er ikkje mogleg å ha fleire enn éi konto for utbetalingar frå Nav.

Det blir mogleg å oppgje KID i innsendinga (frivillig).

Status på utbetaling

De kan følgje status på utbetalinga via lenkja «Detaljar». Her får de òg høve til å laste ned opplysningar om utbetalinga. PDF-nedlastinga inneheld ingen opplysningar om deltakarane i tiltaket.

Avbryt behandling av krav

Dersom de oppdager feil i eit krav de har sendt inn, kan de avbryte det inntil Nav har starta behandlinga av kravet. De kan starte ei ny innsending med korrekte opplysningar etter at kravet er avbrutt. Ver merksam på at eit avbrutt krav framleis vil vere arkivert hos Nav.

Utbetalingstidspunkt

For tiltaka Avklaring, Oppfølging, Arbeidsretta rehabilitering og Digitalt jobbsøkarkurs: De kan sende inn krav om utbetaling frå den 7. i månaden etter at aktiviteten er gjennomført. Til dømes kan de sende inn krav for perioden september frå den 7. oktober. Utbetalinga skjer normalt 30 dagar etter den 7. i månaden. Det vil seie at for perioden september kjem utbetalinga 6. november.

For øvrige tiltak kjem utbetalinga kort tid etter at Nav har godkjend beløpet.

Merking av utbetaling

Har de oppgjeve KID i innsendinga, blir utbetalinga merkt med dette når beløpet er utbetalt. Om ikkje, blir utbetalinga merkt med tiltakstype, periode og tilsegnsnummer.

Logg deg på løysinga

Gå til tjenesten «Utbetalinger» for tiltaksarrangører.

Utbetalingar for tiltaksarrangørar

Korleis få tilgang til løysinga?

Tilgang til løysinga blir gitt gjennom Altinn. Det er leiaren hos tiltaksarrangøren som skal tildele ei enkeltrett til den tilsette som skal bruke løysinga. Det kan ta om lag ein time før tilgangen blir oppdatert i systemet. Det er viktig at den tilsette får tilgang på rett organisasjonsnummer.

Dagleg leiar vil ikkje ha automatisk tilgang til tenesta og må difor delegere ho eksplisitt til seg sjølv dersom det er behov for tilgang.

Enkeltretten i Altinn heiter «Be om utbetaling – Nav Arbeidsmarknadstiltak».

Den tilsette som skal nytte tenesta, må logge seg på med anten BankID, Buypass eller Commfides (sikkerheitsnivå 4). MinID (sikkerheitsnivå 3) skal berre nyttast dersom den tilsette ikkje har norsk fødselsnummer. I slike tilfelle skal MinID-appen nyttast for innlogging.

Dine personopplysningar

For å kunne bruke denne tenesta, må Nav behandle personopplysningar om deg.

Som tilsett hos ein tiltaksarrangør har du i tenesta Utbetalingar for tiltaksarrangørar tilgang til å sjå deltakarar som er på arbeidsmarknadstiltak hos dykk.

For at du skal kunne bruke tenesta, må Nav behandle desse personopplysningane om deg:

Namn
Fødselsnummer
Verksemda du jobbar for

Når du loggar inn med ID-porten, behandlar Nav fødselsnummeret ditt for å sjekke om du skal ha tilgang til tenesta. Namnet og fødselsnummeret ditt blir lagra.

Desse personopplysningane saman med organisasjonsnummeret til verksemda blir òg brukte for å hindre ugyldig bruk av tenesta.

Det juridiske grunnlaget for Nav som behandlingsansvarleg for personopplysningane dine, følgjer av personvernforordninga art. 6 nr. 1 bokstav c. Behandlinga er nødvendig for å oppfylle kravet til personopplysningssikkerheit i personvernforordninga art. 32, og den registrerte sin rett til innsyn jf. GDPR art. 15 c.

Kven har tilgang til personopplysningane dine?

Utviklingsteamet som driftar løysinga i Nav
Utviklingsteamet som driftar innsynsloggtenesta i Nav

Lagring og sletting

Personopplysningane dine blir oppbevarte så lenge det er nødvendig for føremålet. Opplysningar Nav ikkje har ei lovpålagd plikt til å oppbevare, blir sletta når behovet fell bort.

Dine rettar

Du kan krevje innsyn og retting av personopplysningar som Nav behandlar. I nokre situasjonar har du òg rett til å få sletta personopplysningar. Du kan lese meir om rettane dine hos Datatilsynet (datatilsynet.no).

Dersom du har fleire spørsmål om Navs behandling av personopplysningar i denne tenesta, kan du kontakte oss på telefon 55 55 33 36.
Du kan òg kontakte Navs personvernombod dersom du har spørsmål om korleis Nav behandlar personopplysningar, eller dersom du treng hjelp til å ivareta personverninteressene dine.
Sjå òg Navs personvernerklæring.