Ved utgangen av mars 2024 var det 368 800 mottakarar av uføretrygd. Det er 2 200 fleire mottakarar enn ved utgangen av førre kvartal.
Delen uføretrygda i befolkninga har likevel halde seg stabil på 10,4 prosent sidan førre kvartal, men gått ned med 0,1 prosentpoeng på eitt år.
– Fleire enn ein av ti personar i alderen 18-67 år fekk uføretrygd ved utgangen av 1. kvartal. Delen uføretrygda aukar med alderen, og det er særleg mange kvinner i alderen 45-67 år som får uføretrygd, seier arbeids- og velferdsdirektør Hans Christian Holte.
Figur 1. Talet på mottakarar av uføretrygd (venstre akse) og prosentdelen mottakarar 18-67 år* (høyre akse). Per kvartal 31.3.1996-31.3.2024.
Kjelde: NAV
Overgangen frå AAP
Dei fleste nye uføretrygda har tidlegare fått AAP, og i 1. kvartal 2024 fekk 67,8 prosent av mottakarane AAP før dei vart uføretrygda. Det er 2,4 prosentpoeng høgare enn same periode i 2023. Vi antek at talet på dei som sluttar å få AAP og startar å få uføretrygd vil auke mot slutten av året, og følger trenden frå tidlegare år.
Delen unge uføre har minka det siste året
Delen unge i prosent av befolkninga som fekk uføretrygd gjekk ned med 0,1 prosentpoeng det siste året og er no på 2,6 prosent, det er likt frå førre kvartal. Samanlikna med for 10 år sidan har delen unge uføre auka med 1,2 prosentpoeng.
– Alle dei offentlege velferdstenestene bør gjere meir for å hjelpe flest mogleg tilbake i utdanning og arbeid, og vi må fortsette å utvikle eit godt samarbeid på tvers. Det viktigaste vi kan gjere er å sørge for at fleire tar utdanning, får helsehjelp og får tett oppfølging frå NAV. I tillegg er det viktig at arbeidsgjevarar opnar dørene for unge, seier Holte.
Vi finn størst del av unge uføretrygda i Vestfold, Østfold, Buskerud, Innlandet, Telemark og Agder, kor over 3 prosent av befolkninga mellom 18-29 år fekk utbetala uføretrygd. Oslo hadde klart lågast del, med 1,4 prosent av befolkninga.
Figur 2. Prosentdelen mottakarar av uføretrygd 18-29 år etter fylke. 31.3.2024
Kjelde: NAV
Det er fleire faktorar som påverkar kor mange unge uføre dei ulike fylka har. Nokre fylkar har mellom anna fleire unge med alvorlege lidingar, men andre forhold som til dømes flytting spelar og inn.
Fylkar med dei store studiebyane, kor ein finn meir variasjon i arbeidsmarknaden, har ei høg tilflytting av unge som ikkje er uføre. Viss dei unge ikkje-uføre til dømes ikkje hadde flytta frå heimfylket, så ville delen uføre i heimfylket vore lågare. Dette kan vere med på å auke forskjellane mellom fylka. Dette viser ein NAV-analyse om fylkesvise forskjellar frå Kalstø og Danielsen (2022).
Flest fekk uføretrygd i Innlandet, Agder, Østfold og Telemark
Delen som fekk uføretrygd i prosent av befolkninga var høgast i Innlandet (14,3 %), Agder (14,2 %), Østfold (14,0 %) og Telemark (14,0 %). Delen var lågast i Oslo (6,2 %).
Figur 3. Prosentdelen mottakarar av uføretrygd etter fylke. 31.3.2024
Kjelde: NAV
– Fylke med høg del eldre befolkning har òg ein høg prosentdel som får uføretrygd. Vi ser at dess yngre befolkninga i fylke er, jo lågare del av befolkninga mottek uføretrygd. I hovudstadsregionen gjer den fleksible og varierte arbeidsmarknaden at delen av befolkninga med uføretrygd òg er lågare der. Dei har òg ei høgare tilflytting av personar som ikkje er uføre, noko som påverkar aldersgjennomsnittet på befolkninga i fylket, seier Holte.
.png&w=1440&q=90)
.png&w=1440&q=90)
.png&w=1440&q=90)