Rutine for innlevering av hjelpemiddel ved dødsfall
Rutinen gjeld for NAV Hjelpemiddelsentral Vestland, Bergen. Rutinen skal sikre at utlånte hjelpemiddel vert leverte inn eller registrerte på nye brukarar.
Informasjon til kommunen og til buet
Hjelpemiddelsentralen får lister over mors (dødsfall) kvar veke. Vi sender opplysingar til kommunen eller bydelen, med namn på avdøde og liste over hjelpemiddel som skal leverast inn. Hjelpemiddel som kommunen kan behalde, tek vi ut av listene. Vi legg ved skjema for innlevering av hjelpemiddel.
Hjelpemiddelsentralen sender òg brev til buet, med praktisk informasjon og med oversikt over kva hjelpemiddel som skal leverast tilbake. Brevet til kommunen og brevet til buet vert sende samtidig.
I tillegg sender vi e-post til kommunen/bydelen, der vi legg ved excel-oversikt over alle hjelpemidla vi har registrert på brukaren.
Kommunen hentar eller tek imot hjelpemidla etter avtale med pårørande/buet. Både kommunen og ein representant frå buet skal signere på innleveringsskjemaet som følgjer hjelpemiddelet tilbake til NAV Hjelpemiddelsentral.
Manglande tilbakelevering
Dersom NAV Hjelpemiddelsentral ikkje får inn hjelpemidla, sender vi inntil to purringar til kommunen. Vert hjelpemidla framleis ikkje leverte, kan kommunen risikere erstatningskrav.
Rutine for fastmonterte hjelpemiddel og elektromedisinsk utstyr
Dersom brukaren hadde fastmonterte hjelpemiddel i bustaden, må kommunen undersøkje om det er hensiktsmessig å overføre dei til andre personar som bur der. Viss det er tilfellet, må kommunen søkje om å overføre hjelpemidla til ny brukar. Fastmonterte hjelpemiddel er merkte med farge.
Dersom hjelpemidla skal leverast inn, må kommunen bestille demontering.
Kommunen kan ta kontakt på same e-postadresse, viss det er hjelpemiddel dei vil behalde. Kommunen kan ikkje overta elektromedisinsk utstyr som skal ha periodisk ettersyn frå NAV Hjelpemiddelsentral.