Publisert 9. januar 2024
Leat go goassege vásihan ahte galggat bidjat sániid dakkár áššái mii lea dutnje váttis ja rašši - eará gillii go du eatnigillii? Dat ahte oažžut ipmárdusa NAV:s sáhttá leat mearrideaddjin dasa ahte juohkehaš oažžu dan veahki maid dárbbaša ja masa sus lea riekti. Dál mii geahččalat telefuvdnabálvalusa sámegillii.
Sámi álbmogis lea vuoigatvuohta oažžut seamma buriid bálvalusaid go álbmogis muđui. Vuođđolága § 108 ásaha stáhta eiseválddiide geatnegasvuođa láhčit dili nu ahte sámi álbmot sáhttá sihkkarastit ja ovddidit iežas giela, kultuvrra ja servodateallima.
Midjiide dat mearkkaša ahte mii earret eará fertet láhčit dili nu ahte sámi ássit galget oažžut dieđuid ja bagadallama iežaset eatnigillii. NAV lea danin ásahan našuvnnalaš telefovdnabálvalusa davvisámegillii, álggos ovddasmanniprošeaktan mii bistá cuoŋománu 1. b. 2024 rádjái.
-Hupmat eará gillii go iežas eatnigillii sáhttá vásihuvvot hástaleaddjin. Dárkilis gulahallan lea dehálaš sihkkarastit riekta áššemeannudeami ja áddejumi juohkehačča dárbbuin. Mii fertet dahkat maid sáhttit sihkkarastin dihtii ahte giella ii šatta hehttehussan NAV bálvalusaide, dadjá Kristin Røymo, NAV Romssa ja Finnmárkku fylkkadirektevra.
NAV Oktavuođaguovddáš lea ásahan sierra našuvnnalaš telefonnummira gos barget NAV Ávjovárri davvi sámegielat bagadallit. Váldde áinnas oktavuođa minguin telefovnnas 55 55 33 33.