– Sommarjobb kan vere viktigare enn du trur

Totalt er det om lag 4 000 ledige jobbar i Vestland. Nær ein fjerdedel av desse er innan helse, pleie og omsorg, og mange av desse er sommarjobbar.

Arbeidsløysa er framleis låg, med 6 411 personar registrerte som heilt arbeidsledige i Vestland i mars. Det utgjer 1,9 prosent av arbeidsstyrken i fylket.  

Positivt med tidleg erfaring i arbeidslivet

Avdelingsdirektør Frode Storvik i NAV Vestland meiner tidspunktet er godt for dei som ønskjer å skaffe seg jobberfaring. Han trur sommarjobb kan vere ein god start spesielt for unge arbeidssøkarar.

– Sommarjobb kan vere viktigare enn du trur. Forsking frå SSB viser at ungdom som har arbeidsinntekt før dei er 18 år i gjennomsnitt tener om lag 100 000 meir seinare i livet enn dei som ikkje hadde.  Å få tidleg erfaring frå arbeidslivet kan gi meistring, utvida nettverk og verdifull erfaring som kjem til nytte på fleire måtar, seier Storvik.

Sommarjobbtilskot til unge

– Er du mellom 16 og 29 år og ikkje har arbeidserfaring kan du kontakte ditt lokale NAV-kontor om du ikkje lykkast med å skaffe sommarjobb på eiga hand. NAV-kontoret vil vurdere kva hjelp du treng, og har moglegheit til å nytte NAVs sommerjobbtilskot, seier Storvik.

Tilskotet er for ungdom som er mellom 16 og 29 år som har utfordringar med å komme inn på arbeidsmarknaden på vanlege løns- og arbeidsvilkår.

Arbeidsløysa i Vestland ligg under landsgjennomsnittet på 2 prosent. 32 av kommunane i Vestland har under 2 prosent ledige. Høgast andel ledige har Ulvik med 4 prosent, Årdal og Bømlo med 3,5 prosent.

 

For kommetar til meldinga, kontakt

Frode Storvik, avdelingsdirektør i NAV Vestland, 91 75 02 77

Birgitte B. Lygre, senior kommunikasjonsrådgjevar, 90 50 70 96