Publisert 29. januar 2021|Oppdatert 26. juli 2022
I januar er om lag 13.400 personar registrerte som heilt ledige i Vestland. Dette er ein auke på vel 1000 personar frå desember. Arbeidsløysa i fylket er no på 3,9 prosent.
Trass auka i talet på ledige ser situasjonen lysare ut framover, ifølge den nyaste prognosen for arbeidsmarknaden i Vestland i 2021.
– Dei økonomiske indikatorane peikar mot at 2021 vert eit år med vekst, kor ein del av det ein tapte i 2020 vert henta inn att. Vi venter at talet på ledige går ned med rundt 33 prosent i år, seier direktør i NAV Vestland, Anne Kverneland Bogsnes.
Ho legg til at prognosen legg til grunn at samfunnet ikkje vert stengt ned på nytt, og at dei fleste restriksjonane i samband med koronapandemien etter kvart vert letta.
– Grip sjansen til å ta utdanning
I januar er det over 6.000 ledige stillingar i Vestland. Sjølv om mange ledige etter kvart vil vende attende til arbeidslivet, vil krava til omstilling vere store.
– Mange vil ha behov for å anten ta ei ny utdanning, fullføre avbroten utdanning eller fylle på kompetansen på andre måtar. Endringar i dagpengeregelverket gjer det no mogeleg å kombinere dagpengar med utdanning, seier Bogsnes.
I Vestland tilbyr fylkeskommunen gratis vitnemål eller fagbrev til permitterte og arbeidsledige. Fagskular, studieforbund og andre opplæringsaktørar har òg oppretta utdanningstilbod til næringar som er særleg ramma av restriksjonar i samband med koronaviruset.
– Vi oppmodar alle ledige og permitterte om å vurdere desse mogelegheitene, seier Bogsnes.
Reiseliv og transport har flest ledige med 2.781 personar. Deretter følgjer serviceyrke (1.554), butikk- og salsarbeid (1.393) og bygg og anlegg (1.380). I Vestland er det færrast ledige innan akademiske yrke (188) og jordbruk, skogbruk og fiske (199).
Under landsgjennomsnittet
I Bergen kommune er det no 7.403 heilt ledige, over dobbelt så mange som for eit år sidan.
Utanfor Bergen finn vi den største auken i arbeidsløyse frå 2020 i Øygarden (+ 348 personar), Askøy (+ 260 personar) og Bjørnafjorden (+ 222 personar).
Det er høgast arbeidsløyse i kommunane Aurland (9,5 prosent), Ulvik (6,4 prosent) og Eidfjord (6,2 prosent). Fjaler (1,3 prosent), Årdal (1,4 prosent og Stad (1,5 prosent) har lågast arbeidsløyse i Vestland.
Snittet for heile fylket ligg på 3,9 prosent, under landsgjennomsnittet på 4,4 prosent.
Nøkkeltal for NAV Vestland (berre heilt ledige)
Januar 2021 | Endring frå desember 2020 | |
Heilt ledige | 13.396 | 1.079 |
I prosent av arbeidsstyrken | 3,9 % | 0,3 % |
Langtids arbeidssøkarar | 7.175 | 2,4 % |
Ledig ungdom under 25 år | 1.832 | 12 % |
Tilgang på ledige stillingar | 6.424 | * |
* Grunna endringar i datakjelde har vi førebels ikkje samanliknbare tal for stillingar.
I Tableau kan du filtrere statistikken etter ulike kategoriar.
For kommentar til meldinga, kontakt:
Anne Kverneland Bogsnes, direktør i NAV Vestland, mobil 90 52 10 59
Birgitte B. Lygre, senior kommunikasjonsrådgjevar, mobil 90 50 70 96