Publisert 1. juni 2023
Ein kraftig nedgang i luftvegssjukdomar bidrog til at sjukefråværet i Vestland gjekk litt ned samanlikna med i fjor. Fråværet ligg på 6,2 prosent i første kvartal 2023.
Både talet på sjukdomstilfelle og tapte dagsverk grunna luftvegsjukdomar er halvert sidan i fjor. Likevel bidreg ein auke i muskel- og skjelettlidingar og psykisk sjukdom til at nedgangen ikkje blir så stor.
Kan normalisere psykisk sjukdom
Diagnosegruppene muskel- og skjelettlidingar og psykisk sjukdom utgjer godt over halvparten av det totale sjukefråværet i første kvartal. Direktør i NAV Vestland, Anne Kverneland Bogsnes meiner tett og god dialog mellom sjukemeldt, arbeidsgjevar og leger kan bidra til at fleire kan jobbe medan dei er sjukmeldte.
– Ei gradert sjukmelding, der ein kan jobbe litt, vil for mange ha positive effektar. I tillegg til at det kan vere bra for helsa til den sjuke, kan det bidra til å normalisere psykiske lidingar, seier Bogsnes.
Må samarbeide om løysingar
I første kvartal er 23 prosent av alle sjukefråværstilfella i Vestland graderte. Det er ein liten auke sidan same kvartal i fjor.
Bogsnes oppmodar arbeidsgivarar, legar og den sjukmeldte sjølv til å samarbeide godt for å finne løysingar som bidreg til at endå fleire sjukmeldte kan få ta del i eit arbeidsmiljø.
– Arbeidsgivarar som har tilsette som er sjukmeldte kan gjerne kontakte NAV Arbeidslivssenter Vestland, som har god kompetanse på førebygging av sjukefråvær, seier Bogsnes.
Fakta om sjukefråværet i Vestland i første kvartal 2023
- Høgast fråvær i Hyllestad (8,0 prosent), Øygarden (7,8 prosent) og Samnanger (7,6 prosent)
- Lågast fråvær i Aurland (3,8 prosent) og Gloppen (4,4 prosent)
- Muskel- og skjelettplager er årsak til 33 prosent av tapte dagsverk. Deretter kjem med psykiske lidingar med 23 prosent og sjukdom i luftvegane med 10 prosent.
- Helse- og sosialsektoren har høgast sjukefråvær med 9,2 prosent.
- Vel 69 prosent av sjukefråværa er kortare enn 16 dagar.
- Sjukefråværet i Vestland ligg med 6,2 prosent litt over landsgjennomsnittet på 6,1 prosent.
Tal for alle kommunane i Vestland finst på statistikksidene våre.
For kommentar til meldinga, kontakt:
Anne Kverneland Bogsnes, direktør i NAV Vestland, mobil 90 52 10 59
Birgitte B. Lygre, senior kommunikasjonsrådgjevar, mobil 90 50 70 96
