Samarbeidsavtale med Syns- og audiopedagogisk teneste
Avtalen mellom Syns- og audiopedagogisk teneste og NAV Hjelpemiddelsentral Vestland, Bergen vart inngått i november 2022 og varar fram til ein av partane seier han opp. Målet er å samordne forvaltning og formidling av hjelpemiddel til personar med høyrselshemming, synshemming og døvblindheit.
Føremål
Partane pliktar gjennom denne avtalen å utvikle eit godt samarbeid med utgangspunkt i felles utfordringar på hjelpemiddelområdet, kompetanse- og informasjonsdeling, ein koordinert internkontroll, effektiv formidling og forvaltning.
Lover og føreskrifter
Samarbeidsavtalen er regulert etter lover og føreskrifter. Som vedlegg til avtalen har vi samla oversikt over lover, føreskrifter og anna relevant materiell.
Kompetanse
God samhandling mellom SAPT og NAV HMS er ein nødvendig føresetnad for å kunne gje brukar ei heilskapleg god løysing.
Saman skal vi utvikle og gjennomføre kompetansehevande tiltak som bidreg til gode tenester for brukarane. Det er eit mål at kompetansen er nær brukar. Dersom SAPT ikkje har god nok kompetanse vil NAV HMS understøtte SAPT ved å nytte digital samhandling eller møtast fysisk for å finne løysingar i den einskilde sak.
Målet er å finne løysingar for brukar og i tillegg bidra til læring på lang sikt for alle partar.
NAV HMS er eit ressurs og kompetansesenter og skal gje hjelp og støtte til SAPT sitt personell med opplæring og kompetansebygging. NAV HMS har både generelle kurs via kurskalenderen og kan skreddarsy opplæring etter innspel/behov frå SAPT/kommunane i region Hordaland eller etter innspel frå NAV HMS. Via samarbeidsforum kan det også vera aktuelt å initiera ulike arbeidsgrupper på tvers av sentralen og SAPT.
SAPT har ansvar for innføring i bruk av hjelpemidlar, samt evaluering av bruk av hjelpemidla. NAV HMS har ansvar for at deira tilsette har kompetanse på rettleiing, oppfølging, opplæring og evaluering av hjelpemiddel.
Felles område for samhandling
I åra som kjem vil vi sjå ei endring i alet på eldre og yngre med behov for koordinerte tenester. For å lukkast med å gje rett tenester til rett tid er det behov for god samhandling mellom SAPT og NAV HMS.
Område vi ser eit behov for tett samhandling:
- smidige overgangar for barn og unge
- bidra til at den eldre delen av befolkninga kan bu lengst mogleg heime
- legga til rette for god dialog med brukarorganisasjonar
- legga til rette for at brukar sjølv er godt kjent med kor ein finn tenestene og formidlingsprosessen knytt til dette
- auka digitalisering i samfunnet vil krevje digital kompetanse i alle ledd, både til brukarar og tenesteutøvarar
- bidra til at fleire med nedsett funksjonsevne kjem i/blir verande i arbeid
- bidra til god forvaltning og gjenbruk av hjelpemidlar innan felles fagområde
Mangelfull universell utforming generelt i samfunnet fører til at personar med ei funksjonsnedsetting treng hjelpemiddel som må kompensera for dårleg tilrettelegging. SAPT og NAV HMS ynskjer saman å ha fokus på tema «universell utforming».
Ansvarsfordeling mellom SAPT og NAV Hjelpemiddelsentral Vestland, Bergen
SAPT skal sørge for kartlegging og funksjonsvurdering slik at brukar sitt totale behov for hjelp vert lagt til grunn.
SAPT skal hjelpa fylkeskommunen og kommunane med tenester på områder der desse ikkje har tilstrekkeleg fagleg kompetanse på feltet. Tenestene frå SAPT gjeld syns- og audiopedagogisk rådgieving for brukarar busett i gamle Hordaland fylke. Alle som har eit reelt høyrsels- eller synstap med dokumentasjon frå spesialisthelsetenesta kan få hjelp frå tenesta. Prioriterte grupper er barn og unge. Eit viktig premiss for arbeidet er bistand til inkludering i dagleglivet og at flest mogleg brukarar i alle aldersgrupper vert tatt vare på sin arena.
SAPT gjev bistand til utprøving av hjelpemidlar utlånt SAPT frå NAV HMS.
NAV HMS har det koordinerande ansvar for formidling og forvalting av hjelpemidlar. Det inneber at NAV HMS hjelper med kompetanse knytt til utredning, utprøving og opplæring i dei kompliserte sakene kor SAPT/kommunane ikkje har naudsynt kunnskap, eit eksempel kan vera løysing rundt leselister og hjelpemiddel knytt til cochleaimplantat.
I fylgje «forskrift om hjelpemiddelsentralenes virksomhet og ansvar» har NAV hjelpemiddelsentral ein rådgjevings- og rettleiingsfunksjon overfor kommunen sine fagpersonar på hjelpemiddelområdet.
NAV HMS har eit koordinerande ansvar for formidling og forvaltning av tekniske hjelpemiddel og tolketenester for høyrselshemma, døve og døvblinde. Gjennom tekniske og ergonomiske tiltak skal NAV Hjelpemiddelsentral sikre ei likeverdig og samla problemløysing for brukaren.
NAV HMS har forvaltnings- og finansieringsansvar for hjelpemiddel til brukarar som har varig funksjonstap. Ansvaret gjeld innkjøp av hjelpemiddel, reparasjonar og vedlikehald. NAV HMS skal sikre at utlån av hjelpemiddel skjer i samsvar med Lov om Folketrygd og lowerket som høyrer til. NAV står som eigar på utlånte hjelpemiddel.
Samarbeidsformer
Det vert etablert eit samarbeidsforum på leiarnivå mellom SAPT og NAV HMS. Forumet skal møtast ein gong i året for å følgje opp samarbeidsavtalen, eller oftare ved behov. Møta kan gjennomførast fysisk eller digitalt.
Samarbeidsforumet kan velje å etablere eigne arbeidsgrupper når det er behov for å jobbe med særskilte utfordringar.
NAV HMS kallar inn til samarbeidsmøtet. SAPT og NAV HMS ynskjer å ha eit tett og effektivt samarbeid. Det er eit gjensidig ynskje å involvera/informera kvarandre i interne prosessar som kan påverka den andre part så tidleg som mogleg.
Samarbeidsavtalen er på strategisk nivå. Det operative arbeidet med rutinar og samarbeid kjem i eigne dokument. Er det uklar oppgåvefordeling mellom SAPT og NAV HMS må saka takast opp på det strategiske nivået for avklaring.
Internkontroll
God internkontroll er viktig for å sikra ei effektiv oppfylging i saker. I denne avtalen ynskjer partane å legga vekt på: kvalitet i formidlingsprosess
Avvik, omfang og behov for opplæring samt innhald og gjennomføring av dette arbeidet skal gjensidig meldast og dokumenterast som ein del av partane sitt internkontrollsystem og er fast tema i samarbeidsforum.
Avtaleperiode og oppseiing
Samarbeidsavtalen er ein pågåande avtale og gjeld frå det tidspunktet den er underteikna av partane. Overordna endringar og avgjersler i avtal perioden som påverkar avtalen sitt innhald takast opp særleg mellom avtalepartane. Avtalen kan seiast opp skriftleg av begge partar med seks månaders varsel.
Avtalen finst i to like underskrivne eksemplar, ein for kvar part.
Vedlegg
Lenker til regelverk, rettleiarar og nettstader.
Regelverk
- Lov om folketrygd kapittel 10, som omhandlar hjelpemiddel
- Lov om kommunale helse- og omsorgstjenester mm. (helse- og omsorgstjenestelova) Lov om grunnskolen og den vidaregåande opplæringa (opplæringslova)
- Lov om likestilling og forbud mot diskriminering (likestillings- og diskrimineringslova) Forskrift om hjelpemiddelsentralenes virksomhet og ansvar
- Forskrift om habilitering, rehabilitering og koordinator
- Forskrift om stønad til hjelpemidler mv. til bedring av funksjonsevnen i arbeidslivet og i dagliglivet og til ombygging av maskiner på arbeidsplassen
- Forskrift til opplæringslova
- Forskrift om endring i forskrift om elektroforetak og kvalifikasjonskrav for arbeid knyttet til elektriske anlegg og elektrisk utstyr
- Forskrift om leiing og kvalitetsforbedring i helse- og omsorgstjenesten Forskrift om medisinsk utstyr
- Forskrift om håndtering av medisinsk utstyr
Rettleiarar
- Helsedirektoratet - Nasjonal veileder om rehabilitering, habilitering, individuell plan og koordinator
- Helsedirektoratet - Nasjonal veileder om barn og unge med habiliteringsbehov
- Utdanningsdirektoratet - Veileder om spesialundervisning
- Helsedirektoratet - Nasjonal veileder om kommunikasjons via tolk for ledere og personell i helse- og omsorgstjenestene
Nettstader
- Bufdir.no
- Veiviseren.no
- Kunnskapsbanken.net
- Oversikt over kurs på nav.no
Samarbeidsavtale mellom kommunar og SAPT frå 2018 ligg også ved avtalen.