Meld frå om uhell med hjelpemiddel

Når det skjer uhell ved bruk av hjelpemiddel som er utlånte frå NAV Hjelpemiddelsentral, er det viktig å melde frå så snart som mogleg.

Brukaren, ved kommunal terapeut, pliktar å melde frå om uhell ved bruk av hjelpemiddel som er lånte ut frå NAV.

Når det skjer eit uhell eller ei ulykke med tekniske hjelpemiddel, kan brukar ikkje nytte hjelpemiddelet før det er kontrollert og gjort nødvendige utbetringar av det. I perioden ein ikkje kan nytte hjelpemiddelet grunna uhell, tilbyr NAV Hjelpemiddelsentral smidige løysingar tilpassa kvar enkelt brukar.

Brukarane må vere budde på at det kan ta tid å få reparert eit hjelpemiddel. Det gjeld særleg når ein må bestille reservedelar som har lang leveringstid, eller ein blir nøydd til å erstatte eit skada hjelpemiddel med eit nytt og tilsvarande hjelpemiddel.

Etter eit uhell eller ei ulykke med tekniske hjelpemiddel, blir saka følgd opp av saksbehandlar på NAV Hjelpemiddelsentral. Den som melder frå om uhell og skade, kan be om at saksbehandlar tar kontakt som snart som råd etter at saka er meldt inn.

Det skal meldast frå, utan unødig opphald, om hendingar som kan henge saman med bruk av medisinsk utstyr og som har ført til, eller kunne ha ført til, død eller alvorleg forverring av helsetilstanden til ein pasient, brukar eller annan person.

Hjelpemiddelet skal omgåande leverast til NAV Hjelpemiddelsentral. Produktet skal merkast med gul lapp og 'uhell'.

Ved dødsfall, ring NAV Hjelpemiddelsentral Vestland snarast mogleg etter ulykka, på telefon 40 70 28 12 (Bergen) eller 40 70 28 14 (Førde).

Rapport skal sendast på e-post seinast påfølgjande dag.

Skriv 'Uhell med hjelpemiddel' i emnefeltet.

Rapporten må innehalde informasjon om desse punkta: 

  • beskriving av hendinga/uhellet (til dømes kollisjon, utforkøyring, velt, fall eller påkøyrsel)
  • produktnamn (sølvlapp)
  • hms artikkelnummer
  • serienummer (sølvlapp)
  • brukarnummer og/eller fødselsdato
  • dato og klokkeslett for hendinga
  • opplysingar om skade på brukaren
  • kunne hendinga ført til forverra helsetilstand for brukaren?
  • er brukaren i stand til å bruke hjelpemiddelet etter kontroll/byte?
  • har brukaren behov for same hjelpemiddel?
  • ved uhell med elektrisk rullestol, personløftar eller seng, skal det leggast ved dokumentasjon på at servicepersonell har gjennomført opplæring

Legg ved bilete som dokumentasjon.

Rapporten skal ikkje innehalde personopplysingar. 

Dersom brukaren sitt behov er endra, må det sendast ny søknad, og hjelpemiddelet må leverast inn med skjema for innlevering.

Hjelpemiddel som ikkje er leverte av NAV

Når hjelpemiddelet er lånt ut frå NAV, skal kommunen rapportere til NAV Hjelpemiddelsentral. Viss hjelpemiddelet er kjøpt privat, skal kommunen rapportere direkte til Statens legemiddelverk.

Les meir på Statens legemiddelverk sine nettsider.

Bistand til pårørande

NAV Hjelpemiddelsentral kan hjelpe pårørande med oppfølging etter uhell eller ulykke.

Kommunen skal undersøke om pårørande til brukaren ønskjer hjelp frå hjelpemiddelsentralen. Meld inn behovet i samband med rapportering. Skriv 'behov for samtale med pårørande' i rapporten.

Vurder funksjonsevnen

Når det skjer uhell med elektrisk rullestol som brukaren betener sjølv, skal den kommunale terapeuten følgje opp brukaren og vurdere om han eller ho har god nok funksjonsevne til å betene den elektriske rullestolen.

Viss det vert avdekt at brukaren ikkje har god nok funksjonsevne til å kunne ferdast trygt, skal hjelpemiddelet leverast tilbake.