Distribusjon og innlevering av hjelpemiddel

Informasjon om transport og distribusjon av hjelpemiddel, og om innlevering av hjelpemiddel som ikkje lenger er i bruk.

Eg skal levere tilbake hjelpemiddel. Kva gjer eg? 

Det er heimkommunen din hentar hjelpemiddel som skal i retur. Ta kontakt med kommunal mottaksstad i kommunen, og gjer avtale om henting. Viss du ikkje veit kva som er kommunal mottaksstad i din heimkommune, ringer du kommunen sitt hovudnummer.

Kommunen hentar hjelpemidla og ordnar vidare transport til NAV Hjelpemiddelsentral Hordaland.

Viss du bur i Bergen kommune tek du kontakt med Hjelpemiddelhuset:
Telefonnummer - 53 03 48 80
E-post - brukerservice.hjelpemiddelhuset@bergen.kommune.no

Eg skal levere tilbake fastmonterte hjelpemiddel som må demonterast. Kva gjer eg?

Kontakt din heimkommune viss du skal levere tilbake store, fastmonterte gjenstander som treng demontering av fagperson. Døme på hjelpemiddel er takheis, trappeheis, dørautomatikk, køyrerampe, hev-/senk-kjøkken, hev-/senk-vask, stellebord og badekar.

Kommunen sender skriftleg melding til NAV Hjelpemiddelsentral Hordaland på skjemaet "Reparasjon eller demontering av hjelpemiddel". Følg rettleiinga på skjemaet, og hugs å opplyse om kvar hjelpemidla befinn seg, og om namn og telefonnummer til kontaktperson.

Eg har fått innvilga søknad om hjelpemiddel. Når får eg hjelpemidlet utlevert?

Utleveringstider varierer og heng saman med om hjelpemidlet finst på lager eller om det må bestillast frå leverandør. Hjelpemiddel frå eige lager har utleveringstid på gjennomsnittleg 2-3 veker frå vedtaksdato. Viss hjelpemidlet må bestillast frå leverandør, reknar vi 3-5 veker. For hjelpemiddel som krev spesialtilpassing, varierar utleveringstida etter kompleksitet.

Hjelpemiddel vert utlevert til brukarane via faste mottaksstader i kommunane. I Bergen kommune skjer levering og henting dagleg. For dei fleste andre kommunar er det transport ein gong i veka. Køyreplan ligg på NAV Hjelpemiddelsentral Hordaland sine sider.

Kva tid kjem hjelpemidlet til kommunal mottaksstad?

NAV Hjelpemiddelsentral har som mål å utlevere 80 % av alle hjelpemiddel innan tre veker etter at søknaden er innvilga. For å sikre raskast mogleg levering, oppfordrar vi søkarar til å prioritere lagervareprodukt når det er mogleg.

Får eg eit nytt eller eit brukt hjelpemiddel?

Hjelpemidlet du får utlevert frå NAV Hjelpemiddelsentral, kan ha vore brukt før. Med utgangspunkt i eit samfunnsøkonomisk ansvar, resirkulerer vi ein del av dei hjelpemidla vi leverer ut. Det gjeld i hovudsak store og kostbare hjelpemiddel, som rullestolar, personløftarar, senger, lese-tv og liknande. 

Vi følger strenge hygieniske og tekniske retningsliner, når vi resirkulerer hjelpemiddel.

Kan kommunen behalde hjelpemiddel, når brukaren ikkje treng dei lenger?

Hjelpemiddel er kun på utlån og skal leverast tilbake når brukaren ikkje treng dei lenger. Kommunen kan i nokre tilfelle overta enklare hjelpemiddel. Oversikt over kva for hjelpemiddel dette gjeld ligg på NAV Hjelpemiddelsentral Hordaland sine nettsider om Bestillingsordninga. I tillegg kan kommunen overta ein del hjelpemiddel etter avtale med NAV Hjelpemiddelsentral Hordaland.

Har NAV Hjelpemiddelsentral Hordaland hjelpemidlet på lager?

Lagervare hos NAV Hjelpemiddelsentral er hovudsakleg produkt som er rangerte som førsteval i gjeldande avtaler for dei ulike hjelpemiddelkategoriane (sjå Hjelpemiddeldatabasen). I tillegg har vi til kvar tid resirkulerte hjelpemiddel inne, som er klargjorte for ny utlevering.

Tilbake til "Ofte stilte spørsmål om hjelpemiddel"

 

Fakta

Utlevering av hjelpemiddel

Hjelpemiddel vert utleverte til brukarane via faste mottaksstader i kommunane. Levering og henting skjer cirka ein gong i veka, etter fast køyreplan. Køyreplanen er publisert på NAV Hjelpemiddelsentral Hordaland sine nettsider på nav.no. Endringar i køyrerutene i samband med høgtider og feriar, vert òg publiserte her.

Transportordninga har grunnlag i samarbeidsavtalen mellom kommunen og NAV Hjelpemiddelsentral.

Tilbakelevering av hjelpemiddel

Hjelpemiddel som skal leverast inn etter bruk, blir henta av kommunen og frakta til fast mottaksstad i kommunen.

Når NAV Hjelpemiddelsentral Hordaland tek imot hjelpemiddel frå ein kommunal mottaksstad, kontrollerer hjelpemiddelsentralen at opplysningane på innleveringsskjemaet er i samsvar med leveransen.