Áigeguovdilis fáddát

Rávvagiid ja bagadallama ulbmil ii leat dušše čoavdit dálá váttisvuođaid, muhto maiddái geahččalit hehttet ahte váttisvuođat čuožžilit.

Dus ii dárbbaš leat váttis eallindilli go NAV-kantuvrras manat bivdit rávvagiid ja bagadallama, muhto lea vuogas gulahallat NAV:indalle go galgá gávdnat molssaevttolaš čovdosiid ekonomalaš sosiálveahkkái. Jus NAV-kantuvra ii sáhte rávvet ja bagadallat, de sii galget, jus fal lea vejolaš, fuolahit ahte earát suohkanis dahket dan. Buot almmolaš kantuvrrat leat geatnegahtton addit dieđuid, rávvagiid ja bagadallama iežaset doaimma birra. NAV-kantuvrras lea dasa lassin viiddiduvvon geatnegasvuohta addit dieđuid, rávvagiid ja bagadallama mii ii leat ráddjejuvvon dušše sin iežaset fágasuorgái.

Gii sáhttá oažžut rávvagiid ja bagadallama?

Eaktun lea ahte don ieš válddát oktavuođa báikkálaš NAV-kantuvrrain go áiggut rávvagiid ja bagadallama oažžut. Go válddát oktavuođa NAV-kantuvrrain, de sii sáhttet bidjat johtui doaimmaid gávnnahan dihte maid don dárbbašat. 

Muhtun oktavuođain sáhttá maiddái NAV-kantuvra iežas álgaga vuođul addit dieđuid, rávvagiid ja bagadallama jus dat sáhttá váikkuhit dasa ahte dat čoavdá dahje hehtte sosiála váttisvuođaid.

Masa don sáhtát oažžut veahki?

NAV-kantuvra sáhttá addit dieđuid vuoigatvuođaid birra, ja bagadallat njuolggadusaid birra ja dan birra mii dábálaš bargovuohki bálvalusain lea.

Ovdamearkkat dasa makkár dieđuid sáhtát oažžut ja masa sáhtát oažžut veahki

• dieđuid áššemeannudannjuolggadusaid, váidinvejolašvuođa ja áššemeannudanáiggi birra
• veahki deavdit ohcamušaid
• dieđuid eará addosiid birra maidda dus sáhttá leat riekti
• dieđuid orrunviessogažaldagaid birra (viessoláigogaskkusteapmi, šiehtadusat, njuolggadusat ohcat suohkanlaš ja stáhtalaš orrundoarjaga)
• dieđuid bargogaskkusteami birra ja bagadallan bargohcama oktavuođas
• dieđuid mánáidgárddiid ja skuvllaid birra
• bearašráđđeaddin
• sáddejuvvot eará veahkkeásahussii ja dieđut dearvvašvuođavigiid oktavuođas
• dieđut ekonomalaš ráđđeaddima birra 
• rávvagat ja bagadallan gárihuhttinmirkogeavaheddjiide ja sin lagamusaide

Vaikko NAV-kantuvra ii dieđe visot buot áššesurggiin, de sii sáhttet veahkehit ja vaikko čujuhit du viidáset rievttes ásahussii.

Háliidat go veahki, rávvagiid dahje máhtolašvuođa bággonáittosdili birra, de gávnnat eanet dieđuid dan birra Mánáid-, dásseárvo- ja searvadahttindepartemeantta neahttasiidduin.

Jávohisvuođabággu

NAV-kantuvrra ráđđeaddiin ja áššemeannudeddjiin lea jávohisvuođabággu.

Jus lea váttis ovdanbidjat ášši ja oažžut bagadallama rabas vuostáiváldimis, de sáhtát bivdit ahte dakkár ráđđeaddin dahkkojuvvo heivvolaš sajis.