Arbeidsmarked

– Nedgangen i arbeidsløysa har forsterka seg den siste månaden, og vi ser no ein nedgang innan alle yrkesgrupper, seier arbeids- og velferdsdirektør Joakim Lystad. 

Ved utgangen av november er det registrert 61 600 heilt arbeidslause. Nedgangen frå november i fjor er på 7 800 personar, eller 11 prosent.

Færre arbeidslause i alle yrkesgrupper  

Det siste året har arbeidsløysa gått ned i alle yrkesgrupper. Etter ein periode med aukande arbeidsløyse for yrker innan offentleg sektor, ser vi no at utviklinga har snudd også for desse yrkesgruppene. Nedgangen i arbeidsløysa er størst innan bygg og anlegg, med 26 prosent færre arbeidslause enn på same tid i fjor. Også innan ingeniør- og ikt-fag har arbeidsløysa vorte kraftig redusert, med 23 prosent færre arbeidslause enn i november i fjor. 

 Høgast arbeidsløyse finn vi i yrkesgruppene industriarbeid og reiseliv og transport, begge med 3,6 prosent, medan vi finn den lågaste arbeidsløysa innan undervisning med 0,8 prosent,og blant leiarar og innan ingeniør- og ikt-fag , begge med 1,0 prosent arbeidslause. 

Auka etterspørsel innan bygg- og anlegg og ingeniør- og ikt-fag 

Talet på nye registrerte ledige stillingar er om lag på nivå med november i fjor, med ein nedgang på ein prosent. Etterspørselen etter arbeidskraft innan bygg- og anlegg held fram med å auke. I løpet av november blei det registrert 19 prosent fleire ledige stillingar enn i same periode i fjor. Innan ingeniør- og ikt-fag blei det tilsvarande registrert ein auke i talet på ledige stillingar med 13 prosent. Innan barne- og ungdomsarbeid blei det registrert 21 prosent færre nye ledige stillingar enn i november i fjor. 

Færre arbeidslause i dei fleste fylke 

Samanlikna med november i fjor har arbeidsløysa gått ned i alle fylke, så nær som Telemark, der arbeidsløysa har auka med fire prosent i perioden. Nedgangen er størst i Sør-Trøndelag med 23 prosent og i Oslo med 18 prosent. 

Ved utgangen av november er arbeidsløysa lågast i Sogn- og Fjordane med 1,5 prosent av arbeidsstyrken, og i Rogaland med 1,8 prosent. Høgast arbeidsløyse finn vi i Telemark med 3,2 prosent og i Aust-Agder og Østfold, begge med 3,0 prosent. 

Mange har vore arbeidssøkjarar lenge 

Arbeidsløysa går ned blant alle som har vore arbeidssøkjarar under to år, men aukar blant dei som har søkt arbeid i to år eller meir. Dette viser at mange som har søkt arbeid lenge har vanskar med å komme tilbake til arbeid. Ved utgangen av november har kvar tiande arbeidslaus søkt arbeid i to år eller meir.