Sogn og Fjordane

- Det har vore eit bra år på arbeidsmarknaden. Særleg har utviklinga vore god innan industri, bygg og anlegg, fortel direktør i NAV Sogn og Fjordane, Tore Thorsnes.

I industri, bygg og anlegg er arbeidsløysa redusert med høvesvis 19 og 20 prosent i 2011. Samla sett gjekk arbeidsløysa ned med 12 prosent.

- Det komande året ventar vi at arbeidsløysa vil halde seg uendra. Det er likevel ein del uvisse knytt til utviklinga for enkeltverksemder og utviklinga i internasjonal økonomi, seier Thorsnes.

Ved utgangen av desember er det 980 personar heilt utan arbeid i Sogn og Fjordane. På landsnivå er 63 650 personar, eller 2,4 prosent av arbeidsstyrken heilt utan arbeid. 

Sogn og Fjordane har 82 færre heilt ledige enn på same tid i fjor. Dette tilsvarar ein reduksjon på 8 prosent. På landsnivå er reduksjonen 9 prosent.

Størst reduksjon i ingeniør- og ikt-fag

Størst nedgang i arbeidsløysa er det innan  ingeniør og ikt-fag, som har ein reduksjon på 36 prosent samanlikna med desember i fjor. I industrien er det no 247 heilt ledige, 16 færre enn i desember 2010. I bygg og anlegg er det 119 heilt ledige, 47 færre enn desember i fjor.

Reduksjon blant menn, auke blant kvinner

Frå desember i fjor, er arbeidsløysa redusert med 14 prosent blant menn, mens kvinner har ein auke på fire prosent.
- Den største skilnaden ser vi innan industri. Dette skuldast at menn og kvinner jobbar innan ulike typar industri, fortel Thorsnes 

Størst reduksjon i Høyanger

Utviklinga i arbeidsløysa varierar mykje mellom kommunane. 12 av 26 kommunar har ein reduksjon i arbeidsløysa frå desember. Høyanger (-58 prosent ), Vik (-57 prosent) og Balestrand (- 56 prosent), har størst reduksjon.

Selje og Vågsøy, med høvesvis 4,4 og 2,8 prosent, har høgast arbeidsløyse i desember. I andre enden av skalaen finn vi kommunane Gulen, Vik, Balestrand, Fjaler, Jølster, Hornindal og Gloppen, som alle har ei arbeidsløyse på mindre enn éin prosent.

Positivt for langtidsledige

Talet på personar som har gått ledig meir enn eit halvt år er redusert frå 255 i desember i fjor til 168 i desember i år, ein reduksjon på 34 prosent.
- Dei har vore ei god utvikling dei siste månadene, noko som mellom anna skuldast auka behov for arbeidskraft innan industri, bygg og anlegg, seier Thorsnes. 

Fleire permitterte

157 av dei heilt ledige i fylket er permitterte. Dette er åtte fleire enn i desember i fjor. 81 av dei permitterte kjem frå fiskeindustrien.
- Situasjonen i delar av industrien gjer at talet på permitterte kan auke ytterlegare på nyåret, seier Thorsnes.

Auke i stillingstilgangen

Det blei registrert 220 nye ledige stillingar i desember. Dette er ein auke på 13 prosent frå desember i fjor. Ingeniør- og ikt-fag har størst auke. Ved utgangen av desember er det registrert 725 ledige stillingar her i fylket, ein auke på 11 prosent frå desember i fjor.