Hordaland

Etter eit rekordhøgt sjukefråvær i tredje kvartal i fjor, ser det ut til at sjukefråværet no går tilbake og stabiliserer seg igjen.

- Reduksjonen kan mellom anna forklarast med ei normalisering av talet på tilfeller med sjukdommar i luftvegane. Dette var med på å dra opp fråværet i same periode i fjor, seier fylkesdirektør i NAV Hordaland Anne Kverneland Bogsnes.

NAV samarbeider både med arbeidstakarar, arbeidsgjevarar og legar for å redusere sjukefråværet.

- Det er viktig at alle partar tek sitt ansvar for å halde sjukefråværet lågast mogleg, mellom anna gjennom å ha fokus på moglegheiter og tilrettelegging på arbeidsplassen, seier fylkesdirektør Anne Kverneland Bogsnes.

Høgast fråvær innan helse og sosial

Sjukefråværet innan helse- og sosialsektoren er høgast. Med eit legemeldt sjukefråvær på 8,5 prosent gjekk over 156 000 dagsverk tapt i denne sektoren frå juli til september. Det legemeldte sjukefråværet har likevel gått ned i nesten alle sektorar. Størst er reduksjonen innan overnattings- og serveringssektoren, med ein nedgang på 1,4 prosentpoeng. Lågast er likevel sjukefråværet innan jordbruk, skogbruk og fiske, med eit legemeldt sjukefråvær på berre 3,7 prosent.

Muskel- og skjelettlidingar toppar lista over årsaker til at arbeidstakarar vert sjukemelde. Deretter følgjer psykiske lidingar. Totalt gjekk nær 595 000 avtalte dagsverk tapt i Hordaland på grunn av legemeldt sjukdom frå juli til september.

Sjukefråværet går ned både blant menn og kvinner. Likevel er det legemeldte sjukefråværet blant kvinner langt høgare enn for menn, med 7,6 mot 4,8 prosent.

Kommunale variasjonar

Samanlikna med same periode i fjor har sjukefråværet gått ned i nesten alle kommunane i fylket. Etne, Fitjar, Ullensvang og Fusa har det lågaste legemeldte sjukefråværet, medan Sund, Askøy, Modalen, Fjell og Osterøy ligg i andre enden av skalaen. I Bergen har sentrum og dei sørlege bydelane det lågaste sjukefråværet, medan Laksevåg og Arna har høgast fråvær på grunn av legemeldt sjukdom.