Kvalifiseringsprogrammet - ein veg ut av fattigdom

Kva er eit kvalifiseringsprogram?

Kvalifiseringsprogrammet er eit tilbod til deg om opplæring og arbeidstrening, og den oppfylginga du treng for å kome i arbeid eller meiningsfull aktivitet. Programmet gjev deg også ein moglegheit for å avklare kva andre rettar til inntekt du kan ha dersom du ikkje klarar vanleg arbeid.

I reglane for programmet gjeld også:

• Programmet skal vere på full tid .
• Du får lønn og vanleg ferie.
• Du har rett på barnetillegg dersom du har barn og kan ha rett til bustønad dersom du har eigen bustad. 

Noko for deg?

Kvalifiseringsprogrammet er ein ny moglegheit for deg som:

• ynskjer å kome i arbeid eller aktivitet og ynskjer å bruke evner og ressursar på noko nyttig og meiningsfullt
• har levd på sosialhjelp over lang tid, eller står i fare for å kome i ein slik situasjon
• har vært i ulike hjelpetiltak tidlegare, utan at dette har ført til arbeid eller avklaring
• har idear om korleis livet kan bli betre, men er usikker på korleis du skal få det til
• kan tenkje deg ein føreseieleg økonomi med ei fast lønn (kvalifiseringsstønad) tilsvarande 2G, pluss bustønad og barnetillegg. 

Kva inneheld programmet?

Det er kva du kan og kva du ynskjer som avgjer innhaldet i ditt kvalifiseringsprogram. Saman med rettleiar vil du derfor kunne planlegge innhaldet i programmet, som fyrst og fremst skal innehalde:

• arbeidsretta aktivitetar
• opplæringsaktivitetar
• tett individuell oppfylging og rettleiing

Dersom du treng medisinsk eller anna behandling, eller rettleiing på andre livsområde enn arbeid, kan dette innarbeidast. Døme på dette kan vere økonomisk rådgjeving, butilhøve, fritidsaktivitetar, svevnproblem, kosthald og fysisk trening.

Du får ansvar for å fylgje opp planen, i samarbeid med rettleiar frå NAV-kontoret. 

Kva er kvalifiseringsstønad?

Som deltakar i kvalifiseringsprogram har du rett til kvalifiseringsstønad.

• Stønaden er på 2G.
• For deltakarar under 25 år er stønaden 2/3 av full stønad.
• Det blir gjeve eit barnetillegg for 22 dagar per månad
• Du må betale skatt av stønaden.

Kvalifiseringsprogram kan gjevast for ein periode på inntil eitt år. Etter ei ny vurdering kan det bli forlenga med eitt år, eventuelt meir dersom det er nødvendig.

Trur du kvalifiseringsprogrammet kan vere noko for deg? Ta kontakt med ditt lokale NAV-kontor.