Hjelpemiddelområder

Kven kan få høreapparat/tinnitusmaskerar?

Er hørselstapet ditt så stort at eit høreapparat vil vere svært viktig for utsiktene dine til å høre betre, kan du få stønad til dette.

Har du øyresus (tinnitus), kan du få stønad til tinnitusmaskerar, som er eit apparat som ved hjelp av motlyd kan dempe plagene ved øyresus.

Hørselsproblema må vere varige (minst to år), og hjelpemiddelet må vere nødvendig og føremålstenleg for å betre funksjonsevna.

Korleis søkjer du?

Du må ha rekvisisjon for å få høreapparat eller tinnitusmaskerar.Det er hørselssentralen ved sjukehuset eller øyre-nase-hals-spesialist som kan gi ein slik rekvisisjon.

Søknadsskjema

• Krav om utlån av høreapparat/tinnitusmaskerar

Søknaden skal sendast NAV.

Dei fleste søknadene blir avgjorde innan ein månad. Maksimal behandlingstid er seks månader. Når NAV har innvilga søknaden, tek du han med til den som forhandlar apparatet, slik at det kan tilpassast deg før du får det utlevert.

Kva kan du få?

• Høreapparat med tilbehør og tilpassa øyreproppar
• Tinnitusmaskerar
• Dekning av utgifter til reparasjon
• For personar under 18 år blir også utgifter til service dekte
• Dekning av utgifter til legeundersøking og reiseutgifter

Du kan berre få apparat som er omfatta av leverings- og prisavtalar som NAV og leverandørane har inngått.

Nykjøp

Du kan få dekt utgifter til nytt apparat etter minst seks år dersom

• Det apparatet du har, ikkje lenger fungerer tilfredsstillande og ikkje kan reparerast, eller
• Du har prøvd eit anna apparat som gjer at du hører vesentleg betre.

Du kan få nytt apparat sjølv om det ikkje har gått seks år dersom

• Hørselstapet ditt har endra seg slik at eit nytt apparat med andre tekniske eigenskapar gir deg ein vesentleg betre hørsel, eller
• Dersom det har komme ein ny type apparat på marknaden som kan avhjelpe hørselstapet ditt på ein vesentleg betre måte enn det apparatet du alt har.

Tilbakelevering

Høreapparatet og tinnitusmaskeraren er eigedommen til NAV og skal leverast tilbake når du ikkje lenger har bruk for det.

Kor mykje blir dekt av Folketrygda?

Sjå gjeldande satsar.

Ein kan fråvike prisgrensene for analoge apparat og tinnitusmaskerar dersom eit dyrare apparat er nødvendig av medisinske grunnar.

Ein kan berre fråvike prisgrensa for digitale apparat dersom du er under 18 år eller hørselsskaden din kjem av godkjend yrkesskade.

Når du skal til utlandet

Det finst reglar for hjelpemiddel i utlandet.