Utdanning

Kven kan få hjelpemiddel under utdanning?

Har du funksjonshemming og tek utdanning ut over vidaregåande nivå, eller mottek arbeidsavklaringspengar,  kan du ha rett til hjelpemiddel. Hjelpemiddelet må ha ein klar samanheng med funksjonshemminga og vere nødvendig for å kunne gjennomføre utdanninga.

Korleis går du fram?

Er du student, kan du kontakte

• Studiestaden ved konsulenttenesta
• kommunehelsetenesta
• NAV-kontoret
• NAV Hjelpemiddelsentral

for å få vurdert situasjonen. Mottek du arbeidssavklaringspenger, kan du kontakte lokalt NAV-kontor.

Riktig søknad gir raskare svar

Når du eller nokon av dine nærmaste får behov for eit hjelpemiddel, tek de kontakt med kommunehelsetenesta der de bur. Helsetjenest i kommunen (fysioterapeut eller ergoterapeut) kan gi råd om val og utprøving av hjelpemiddel. Eventuelle mål legges ved søknaden.

Er det behov for hjelp til utgreiing og utprøving, sender ein skjema for tilvisning til NAV Hjelpemiddelsentral. Aktuelt hjelpeskjema må fyllast ut og leggast ved.

Du kan få raskare svar dersom du sjølv skaffar den informasjonen som hjelpemiddelsentralen treng for å behandle søknaden.

Vedlegg til søknaden

• Funksjonsvurdering
• Eventuell individuell oppfølgingsplan
• Hjelpeskjema Arbeid/Arbeidsretta tiltak/Utdanning  

Dersom søknaden dreier seg om datahjelpemiddel, skal du også leggje ved

• Hjelpeskjema for data og kommunikasjonshjelpemiddel

Dei fleste søknadene blir avgjorde innan ein månad. Maksimal behandlingstid er seks månader.

Kva kan du få?

Tilrettelegging av ein studieplass kan både vere eit hjelpemiddel og eit ergonomisk tiltak.

Eksempel på hjelpemiddel er leselist og programvare (som for eksempel syntetisk tale).

Støtta er avgrensa til praktisk tilrettelegging og gjeld ikkje pedagogiske tiltak.

Du kan få hjelpemiddel både heime og på studieplassen.

Hjelpemiddel blir gitt som utlån frå hjelpemiddelsentralen og skal leverast tilbake når utdanninga er slutt eller blir avbroten, eller dersom hjelpemiddelet av andre grunnar ikkje lenger er i bruk.

Kven gjer kva?

• Studiestaden er ansvarleg for å bidra til samarbeid om tilrettelegging av studiesituasjonen din ut frå moglegheiter og behov.
• Funksjonsvurderingar må gjerast av kommunehelsetenesta, eventuelt andre som har kompetanse til å gjere slike vurderingar.
• NAV Hjelpemiddelsentral hjelper deg med rettleiing og rådgiving.

Når og korleis blir hjelpemiddelet utlevert?

Dersom hjelpemiddelet finst på lager, blir det vanlegvis sendt til mottaksstaden i kommunen om lag to veker etter vedtaksdato. Ansvaret for å levere ut hjelpemiddelet ligg hos kommunen, og ein må rekne med noko ventetid. Dersom hjelpemiddelet må bestillast, kan det ta inntil fem veker. Hjelpemiddelet blir vanlegvis utlevert av hjelpemiddelsentralen i det fylket der utdanninga blir teken.