Arbeid

Kven kan få hjelpemiddel og tilrettelegging på arbeidsplassen?

Både arbeidstakarar og sjølvstendig næringsdrivande kan ha rett til tilrettelegging av arbeidsplassen.

Er du arbeidstakar og ønskjer å finne ut kva som kan gjerast på arbeidsplassen din, kan du og arbeidsgivaren ta kontakt med

• bedriftshelsetenesta
• verneombodet
• tillitsvald
• NAV-kontor
• eller arbeidslivssenteret

Er du sjølvstendig næringsdrivande kan du ta kontakt med ditt NAV-kontor eller hjelpemiddelsentralen for å få informasjon om korleis du kan søkje, og kva for dokumentasjon du må skaffe.

Er du på yrkesretta attføring, tek du kontakt med ditt NAV-kontor.

Dersom du er uføretrygda og ønskjer hjelp til å få vurdert utsiktene til å komme i arbeid, kan du kontakte ditt NAV-kontor.

Kven gjer kva?

• Arbeidstakar har ansvar for å medverke til og samarbeide om tilrettelegging av eigen arbeidssituasjon ut frå det som er mogleg og dei behova ho eller han har.
• Arbeidsgivar er pålagd av arbeidsmiljølova å gi tilsette nødvendig utstyr for å utføre arbeidet, og sjå til at utstyret ikkje fører til at arbeidstakaren får helseskadar. Er det behov for tilrettelegging, skal arbeidsgivar i samarbeid med tilsett utarbeide ein individuell oppfølgingsplan.
• NAV lokalt har ansvar når behovet er varig, det vil seie meir enn to år. Tilrettelegging som etter arbeidsmiljølova er ansvaret til arbeidsgivar, kan ikkje finansierast av folketrygda.
• Bedriftshelsetenesta eller kommunehelsetenesta kan hjelpe arbeidstakar og arbeidsgivar med ei funksjonsvurdering for å få behovet vurdert før søknaden blir send til hjelpemiddelsentralen.

Ei arbeidsplassvurdering kan også kjøpast frå godkjende fysioterapeutar eller ergoterapeutar som NAV lokalt har avtale med.

• Hjelpemiddelsentralen kan gi råd og rettleiing.
• Arbeidslivssentra kan hjelpe IA-verksemder.

Riktig søknad gir raskare svar

Er det behov for hjelp til utgreiing og utprøving, sender ein skjema for tilvisning til NAV Hjelpemiddelsentral

Aktuelt hjelpeskjema må fyllast ut og leggast ved søknadsskjemaet

Du kan få raskare svar dersom du skaffar den informasjonen som hjelpemiddelsentralen treng for å behandle søknaden.

Vedlegg til søknaden

• Individuell oppfølgingsplan eller attføringsplan
• Funksjonsvurdering

Tilleggsdokumentasjon for sjølvstendig næringsdrivande:

• Spesifisert oversikt over hjelpemiddel det er søkt om og utskrift av siste års likning med kopi av næringsinntekt, samt pristilbod frå minst to leverandørar

Dei fleste søknadene blir avgjorde innan ein månad. Maksimal behandlingstid er seks månader.

Opplæring og oppfølging

Dersom du har behov for opplæring i bruk av hjelpemiddelet, må det gå fram av søknaden korleis dette skal gjennomførast og kven som er ansvarleg.

Både arbeidstakar og arbeidsgivar evaluerer tiltaket og gir melding dersom det er behov for endring.

Når og korleis blir hjelpemiddelet utlevert?

Hjelpemiddelet kan lånast ut eller givast som eit tilskott.

Dersom du får låne eit hjelpemiddel, skal det leverast tilbake når du ikkje treng det lenger. Sentralen har ansvaret for reparasjon og vedlikehald i utlånstida.

• Ved tilskott får du eit stønadsbeløp. Da er du sjølv ansvarleg for reparasjon og vedlikehald av hjelpemiddelet
• Eit rente- og avdragsfritt lån gjeld berre for sjølvstendig næringsdrivande og er knytt opp mot arbeidsforholdet

Dersom hjelpemiddelet finst på lager, blir det sendt til mottaksstaden i kommunen om lag to veker etter at vedtaket er gjort.

Ansvaret for å levere ut hjelpemiddelet ligg hos kommunen, og du må rekne med litt ventetid. Dersom vi må bestille hjelpemiddelet, kan det ta inntil fem veker.

Video om tilrettelegging av arbeidsplassen kan ein få kjøpt ved å vende seg til Granada, tlf. 69 21 31 40.