Kven kan få stønad til einsleg mor/far?

Du må vere ugift, skilt eller separert. Faktisk samlivsbrot kan på visse vilkår bli jamstelt med separasjon. Du må også vere aleine om omsorga for barnet og fylle vilkåret om ikkje å leve saman med den andre av barnet sine foreldre eller ein du har vore gift med. Du kan heller ikkje få stønad om du har sambuar og har hatt det i 12 av dei siste 18 månadene. Du må ha vore medlem av folketrygda i dei siste tre åra, og du og barnet må bu og opphalde dykk i Noreg. Nokre av vilkåra kan fråvikast etter særskilde reglar.

Alle som får stønad som einsleg mor eller far, må melde frå til NAV om endringar som kan ha noko å seie for retten til stønad eller storleiken på han.

Korleis søkjer du?

Du kan få raskare svar om du sjølv finn fram til den informasjonen NAV treng for å behandle søknaden.

Du må skriftleg krevje stønad til einsleg mor/far. Krav sett du fram på blanketten ”Søknad om overgangsstønad, stønad til barnetilsyn, utdanningsstønad og flytteutgifter til enslig mor/far” – NAV 15-00.01.

På grunnlag av opplysningane du gir her, kan NAV-kontoret ditt vurdere om du fyller vilkåra for rett til stønad som einsleg forsørgjar.

Søknaden sender du til NAV-kontoret der du bur.

Kva kan du få?

Om du fyller dei allmenne inngangsvilkåra for rett til stønad som einsleg mor/far, kan du ha rett til:

• Overgangsstønad
• Stønad til barnetilsyn
• Utdanningsstønad
• Tilskott til flytting for å kome i arbeid

Når du skal til utlandet

Først må du sjekke om du held fram medlemskapen i folketrygda.

Hovudregelen er at du og barna skal opphalde dykk i Noreg.

Stønad kan etter søknad bli gitt under utanlandsopphald om

• utanlandsopphaldet ikkje er meint å vare meir enn seks månader eller
• utanlandsopphaldet er skulda arbeid for norsk arbeidsgivar.

Du har plikt til å melde frå til NAV om du flytter til eller skal opphalde deg i utlandet midlertidig.

For andre som kjem til Noreg

Først må du sjekke om du blir medlem i folketrygda.

For å ha rett til stønad til einsleg mor/far, må du som hovudregel ha vore medlem i folketrygda i dei siste tre åra før kravet blir sett fram. Vilkåret om tidlegare medlemskap gjeld ikkje for flyktingar og statslause. Det er fastsett forskrift som seier i kva tilfelle hovudregelen kan fråvikast (sjå regelverk for forskrift til § 15-2).

Meld frå om endringar

Dersom du får endringar i inntekt, familiesituasjon og/eller jobbsituasjon, eller skal opphalde deg i utlandet, kan det ha noko å seie for beløpet du får utbetalt frå NAV. I slike tilfelle må du derfor straks melde frå til NAV-kontoret der du bur.