Beregning av foreldrepenger

Vuođđu meroštallat váhnenruđa

Váhnenruđa máksá NAV dan vuođu mielde maid mearridit du sisaboađu sturrodaga vuođul mii dus dábálaččat lea. Du dábálaš sisaboađu sturrodat, mearriduvvo oktagaslaš árvvoštallama vuođul.

Don it oaččo váhnenruđa dan oasi ovddas du sisaboađus mii lea guđa geardde badjelis álbmotoaju vuođđusupmi (G). Dáhtomis miessemánu 1. beaivvi 2011 lea vuođđusupmi 79 216 kruvnno.

Dat mii mearrida váhnenruđa mearrideami lea ahte leago dus bargosisaboahtu vai leago dus iežat fitnodat/ealáhus. Sisaboahtu lea golmma lágan:

• Bargosisaboahtu:

Bargosisaboahtu mearkkaša bálká dahje earálágan buhtadus sis geat leat virggis earáid bálvalusas.

• Ealáhusas sisaboahtu:

Ealáhusas sisaboahtu mearkkaša sisaboahtu olbmui gii iežas ovddasvástádusain ja riskkain doaimmaha bistevaš ealáhusdoaimma.

• Sisaboahtu luođobargin (frilanser):

Sisaboahtu luođobargin mearkkaša sisaboađu olbmos gii ieš ovddasvástida ja váldá bargguid main diine, muhto liikká ii leat fásta bálkkáin dahje buhtadusain virgáduvvon bargui siskkobealde makkárge ásahusa.

NAV bidjá maiddái čuovvovaš beliid vuođđun go árvvoštallá:

• Du dálá sisaboahtu.
• Gaskamearri penšuvdnaaddi sisaboađus mii dus lea leamaš golmma maŋemus jagis.
• Du bargodilli. Don galggat dieđihit earret eará dan ahte leatgo aiddobáliid molson barggu, leago dus bálká rievdan dahje leatgo don lasihan/geahpedan bargoáiggi.

Jus dus leat máŋga iešguđetlágan sisaboađu, de gustojit sierra njuolggadusat maid NAV-kantuvra sáhttá dutnje čilget.

Sisaboađut mat váldojit fárrui

Sisaboađut mat váldojit fárrui, lea bálkásisaboahtu ja buhtadus mii lea du iežat bargama vuođul ja mat addet penšuvdnapoeŋŋaid.

Sisaboađut mat eai váldo fárrui

Sisaboađut mat eai váldo fárrui, lea badjeláigge bálká, luopmoruhta, luondduaddosat (naturalytelser) ja buhtadusat dan várás ahte muhtinmuddui dahje ollásii gokčet olggosgoluid barggu oktavuođas.

Váldonjuolggadus bálkábargi váhnenruđa meroštallamii

Váhnenruđa mearrideapmi dahkkojuvvo dan mielde olu go dus lea sisaboahtu juste dalle go du doarjjaáigodat álgá. NAV buohtastahttá dán sisaboađu du gaskamearálaš penšuvdnaaddi sisaboađuin mii dus lea leamaš golbma maŋemus jagi. NAV deattuha čuvgehusaid du bargodili birra dalle go ohcet doarjaga. NAV árvvoštallá ahte galgá go du dálá sisaboahtu dahje gaskamearálaš penšuvdnaaddi sisaboahtu golbma maŋemus jagi adnojuvvot vuođđun go meroštallet váhnenruđa sturrodaga.

Ovdamearka: 

Ohcci muitala ahte son lea aiddo geargan oahpuin ja lea álgán fásta bargui mas jahkesisaboahtu lea 350 000 kruvnno. Ohccis lei beallebargu dan botta go válddii oahpu, nu ahte su gaskamearálaš penšuvdnaaddi sisaboahtu golbma maŋemus jagi lea 130 000 kruvnno. NAV mearrida ahte su sisaboahtu dalle go doarjjaáigodat álgá, čájeha rievttes gova ohcci bargosisaboađus. Mearrádusas lea deaddu biddjon dasa ahte ohcci lea geargan oahpuin ja lea fásta barggus. Váhnenruđa mearrideami vuođđun lea 350 000 kruvnno.

Váldonjuolggadus iešheanalis ealáhusdoalli váhnenruđa meroštallamii

Váhnenruđa mearrideapmi dahkkojuvvo du gaskamearálaš penšuvdnaaddi sisaboađu vuođul mii dus lea leamaš golbma maŋemus jagi. NAV almmatge álohii árvvoštallá čájeha go dát sisaboahtu rievttes gova du sisaboađus daid čuvgehusaid vuođul maid don leat muitalan iežat bargodili birra dalle go ohcet váhnenruđa. Jus du bargodilli dahje bargodoaibma lea rievdan bistevaččat nu ahte du sisaboahtu lea rievdan, de sáhttá NAV atnit vuođđun dan sisaboađu mii dus lea dalle go doarjjaáigodat álgá, ja dan vuođul mearridit váhnenruđa doarjaga sturrodaga.

Ovdamearka:

Ohcci gaskamearálaš penšuvdnaaddi sisaboahtu golbma maŋemus jagi lea 450 000 kruvnno, muhto dál dine jagis 250 000 kr. Ohcci čilge ahte son lei ovdal virgáduvvon bargi, muhto lea cealkán eret barggu ja álgán iešheanalis ealáhusdoallin. NAV mearrida ahte gaskamearri penšuvdnaddi sisaboađus ii muital duohtavuođa dálá bargodili birra. Mearrideamis lea NAV deattuhan ahte rievdadusat leat bistevaččat. Dan dihtii NAV árvvoštallá dan láhkái ahte ohcci sisaboahtu mii sus lea go doarjjaáigodat álgá, lea dat mii galgá mearridit váhnenruđa sturrodaga. Váhnenruđa mearrideami vuođđun adnojuvvo 250 000 kruvdno.

Váldonjuolggadus luođobargi (frilanser) váhnenruđa meroštallamii

Váhnenruđa mearrideapmi dahkkojuvvo dábálaččat du gaskamearálaš penšuvdnaaddi sisaboađu vuođul mii dus lea leamaš golbma maŋemus jagi. NAV almmatge álohii árvvoštallá addá go dát sisaboahtu duohta gova du sisaboađus daid čuvgehusaid vuođul maid don leat muitalan iežat bargodili birra dalle go ohcet váhnenruđa. Jus du bargodilli dahje bargodoaibma lea rievdan bistevaččat nu ahte du sisaboahtu lea rievdan, de sáhttá NAV atnit vuođđun dan sisaboađu mii dus lea dalle go doarjjaáigodat álgá, ha dan vuođul mearridit váhnenruđa doarjaga sturrodaga.

Ovdamearka:

Ohcci gaskamearálaš penšuvdnaaddi sisaboahtu golbma maŋemus jagi lea 200 000 kruvnno. Go váhnenruđa doarjjaáigodat álgá, de čilge ohcci ahte bargodilli ii leat rievdan, muhto su sisaboahtu lea sakka lassánan. Ohcci čilge ahte ággan lea go dán bargosuorggis ádjána guokte-golbma jagi ovdalgo beassá márkaniidda. Ohcci dadjá maid ahte son lea bargan golbma jagi ja maŋemus jahkebealis leat dienasbarggut lassánan. Go doarjjaáigodat álgá, de lea ohcci sisaboahtu 450 000 kruvnno. NAV mearrida ahte dát lea nu stuora rievdadus ahte dálá sisaboahtu galgá adnojuvvot vuođđun mearridit váhnenruđa sturrodaga, mii šaddá 450 000 kruvnno.

Váldonjuolggadus váhnenruđa meroštallamii go don oaččut eará doarjagiid

• Jus don leat barggu haga ja oaččut beaiveruđa, de mearrida NAV váhnenruđa sturrodaga seammá stuorisin go beaiveruhta man don oaččut máksojuvvot. Áhpehis nissoniidda, geat leat ollásii dahje muhtinmuddui barggu haga ja ožžot beaiveruđa, sáhttá váhnenruđa mearridit dan guđa buoremus dienasmánu vuođul mii sis lei dan logi maŋemus mánus ovdalgo doarjjaáigodat álgá, jus dat addá buoremus bohtosa.
• Jus don lea militeara- dahje siviilabálvalusas dahje geatnegahtton siviilasuodjalusbálvalusas, de galgá váhnenruđa mearridanvuođđun leat unnimusat golmma geardde álbmotoaju vuođđosupmi.
• Jus don oaččut bargočielggadanruđa, de mearriduvvo váhnenruhta seammá stuorisin go dat bargočielggadanruhta supmi mii máksojuvvo dutnje.
• Jus don oaččut buohcanruđa, áhpehisvuođaruđa, oahpporuđa, dikšoruđa dahje fuollaruđa, de rehkenastá NAV váhnenruđa dan seammá sisaboađu vuođul maid vuođul dáid doarjagiid addá. 
• Jus okta váhnenruhtaáigodat mielddisbuktá ahte dus šaddá riekti fas ođđa áigodahkii váhnenruđa oažžut (oanehis áigi riegádeami/adopšuvnna gaskka), de adnojuvvo dat váhnenruhtamearri mii máksojuvvo dutnje, vuođđun maiddái ođđa váhnenruđa sturrodahkii. Dat mearkkaša ahte jus dus lea vuoigatvuohta ođđa váhnenruhtii dan gaskkas go vuostáiválddát váhnenruđa mas lea 80 % gokčandássi, de lea dát máksomearri mii šaddá dan ođđa váhnenruhta áigodaga vuođđun. 

Ovdalis áigodagat, mas don leat áigeráddjejuvvon áigodagas ožžon lámisvuođaruđa, rehabiliteren- ja bargoveajuidahttinruđa, de dát eai atte vuoigatvuođa oažžut váhnenruđa.