Nyttig å vite om...

Kva er tilretteleggingsgaranti?

Tilretteleggingsgaranti er ei ordning som skal sikre arbeidstakar og arbeidsgjevar tryggleik for at personar med redusert funksjonsevne får nødvendige hjelpemiddel, tilrettelegging og oppfølging.

Både enkeltpersonar og bedrifter kan nytte ordninga, som er ein førehandsgaranti for tilrettelegging og oppfølging på arbeidsplassen.

Garantien kan gjelde alle NAV sine støtteordningar, og gjev klare tidsfristar for saksbehandlinga i NAV.

Garantien kan gjevast til verksemder, arbeidssøkjarar og personar som i dag er i jobb.

Korleis får du tilretteleggingsgaranti?

• Arbeidssøkjaren, arbeidstakaren eller arbeidsgjevaren kontaktar sitt lokale NAV-kontor med spørsmål om ein tilretteleggingsgaranti.
• NAV vurderer i samarbeid med brukaren kva tiltak som er nødvendige for å få eller behalde ein jobb.
• NAV forpliktar seg til å gjere vedtak om støtte i form av tilskott, hjelpemiddel eller oppfølging innan ein klar frist.
• Garantien vert gjeven skriftleg, og kan f.eks. brukast i samband med jobbsøking

Garantien forpliktar NAV som heilskap. Alle einingar som skal gje service/bistand er forplikta av garantien, dvs.  NAV-kontor, Arbeidslivssentra  og  Hjelpemiddelsentralane.

Kome i gang

For meir informasjon om tilretteleggingsgarantien kan du kontakte ditt lokale NAV-kontor, NAV Arbeidslivssenter eller NAV Hjelpemiddelsentral 

Ein ny måte å arbeide på

Tilretteleggingsgarantien er ein ny måte å arbeide på for å gje bistand til funksjonshemma som treng tilrettelegging for å kome i eller behalde arbeid.

Tilretteleggingsgarantien omfattar alle verkemiddel og tiltak, og er ein skriftleg  servicegaranti som forpliktar NAV til å gje rask saksbehandling og tilpassa oppfølging til deltakarar og arbeidsgjevar.

Innhaldet i tilretteleggingsgarantien

Garantien skal gje tryggleik for at brukaren får nødvendig bistand frå NAV. Målgruppa er arbeidstakarar og arbeidssøkjarar med redusert funksjonsevne og arbeidsgjevarar som tilset ein frå disse gruppene. Tiltak og hjelpemiddel skal verte innvilga og sett i verk så tidleg som mogleg.

Det skal gjevast ein skriftleg garanti i kvart enkelt tilfelle. 

Eksempel på element i garantien:

• Bistand, utgreiing/kartlegging av behov for tilrettelegging av arbeidsplassen, m.a. hjelpemiddel
• Finne eigna tiltaks-/arbeidsplassar
• Arbeidsmarknadstiltak og hjelpemiddel
• Oppfølging over tid, fram til jobb og i jobb, etter individuelle behov
• Oppfølgingsavtale mellom arbeidsgjevar og NAV for å støtte opp om  arbeidsforholdet
• Maksimal saksbehandlingstid for kva tid tilrettelegginga skal vere på plass

Brukaren skal ha ein kontaktperson i NAV  med ansvar for oppfølginga