Ventelønn

Kven kan få ventelønn?

Du må vere tilsett i staten og ha fått oppseiing på eitt av desse grunnlaga:

• Stillinga er inndregen, eller arbeidet har falle bort
• Du er på grunn av sjukdom varig uskikka til å utføre arbeidet ditt på ein forsvarleg måte
• Du har ikkje lenger dei nødvendige kvalifikasjonane som trengs for stillinga

Vidare blir det stilt krav om

• at du som fast tilsett tenestemann har minst to års teneste i staten, og som mellombels tilsett har minst fire års teneste i staten
• at det ikkje er funne anna arbeid internt eller eksternt
• at du ikkje har rett til å ta ut pensjon, også avtalefest pensjon (AFP)
• at du er registrert hos NAV som arbeidssøkjar, og sender meldekort
• at du er reell arbeidssøkjar

Korleis søkjer du?

Sender du inn søknaden seinast to månader før du sluttar, vil NAV Ventelønn garantere utbetaling av ventelønn frå første månad etter at utbetaling av ordinær lønn er stansa.

Søknaden skal sendast av arbeidsgivar til:

NAV Ventelønn
Postboks 7062, St. Olavs plass
0130 Oslo

Klage på vedtak

Vedtaket kan påklagast og skal sendast til NAV Ventelønn. Dersom du ikkje får medhald i klagen, blir han send til NAV Klage og Sør.

Dette kan du gjere sjølv

• Registrere deg som arbeidsledig hos NAV
• Sende elektronisk meldekort
• Leggje CV-en din ut for arbeidsgivarar utan noka anna tilknyting til NAV
• Søkje etter ledige stillingar
• Abonnere på stillingsannonsar via jobbmail

Kva kan du få?

• Full ventelønn tilsvarer 66 prosent av lønna i stillinga ved fråtreding. Det er eit vilkår at du ville ha oppnådd 30 års teneste i staten ved aldersgrensa for stillinga.
• Dersom du ved aldersgrensa ikkje ville ha oppnådd 30 års tenestetid, blir ventelønna redusert tilsvarande.

Ta imot dagpengar samtidig med ventelønn

Vanlegvis vil du ikkje ha rett til dette, men supplerande dagpengar frå NAV kan likevel bli utbetalte samtidig med ventelønn dersom dagpengar vil gi deg ei høgare utbetaling enn ventelønn. Ventelønn gir ikkje grunnlag for seinare utbetaling av dagpengar.

Regulering av ventelønn

Ventelønna blir regulert i det generelle tillegget som blir avtalt i det sentrale lønnsoppgjeret i staten kvart år. Endringar i lønnsplasseringa for stillinga som blir gjorde etter at du har slutta i stillinga, vil det såleis ikkje bli teken omsyn til.

Dette gjeld også for arbeidstakarar frå omdanna verksemder. Ventelønn blir regulert i høve til lønnsoppgjeret i staten kvart år (statleg lønnsregulativ), sjølv om du er lønna i eit anna system når du sluttar i stillinga.

Når blir pengane utbetalte?

Ventelønn blir skattlagd som vanleg arbeidsinntekt og blir utbetalt forskottsvis den 12. i kvar månad via bank eller post.

Dersom ein ikkje har sendt inn skattekort, blir ein trekt 50 prosent i skatt.

Endrar du bankkonto, må du melde frå om dette skriftlegg til NAV Økonomitjeneste, adr: Sognefjordvegen 56, 6863 Leikanger. 

Kor lenge kan ein få ventelønn?

Det er avhengig av alderen din når du sluttar, men kan ikkje bli utbetalt for lengre periode enn den faktiske tenestetida di i staten.

Maksimal ventelønnsperiode for ein tenestemann blir fastsett ut frå alder på fråtredingstidspunktet etter denne skalaen:

• Før fylte 50 år: inntil tre år
• Frå 50 til og med 54 år: inntil fire år
• Frå fylte 55 år: inntil tolv år*

*Ventelønn blir maksimalt utbetalt til du har krav på alderspensjon.

Årleg vurdering av retten til ventelønn

Som hovudregel blir ventelønn innvilga for eitt år. Utover dette må du sende ein ny søknad som blir vurdert på ny.

NAV Ventelønn sender ut ei påminning og eit søknadsskjema i god tid før du skal søkje på nytt.

Miste retten til ventelønn og krav om å vere reell arbeidssøkjar

Du må oppfylle vilkåra for å få ventelønn. Gjer du ikkje det, fell retten til ventelønn bort permanent eller mellombels.

Andre ordningar som kan vere aktuelle

• Fornyings- og administrasjonsdepartementet
• ODIN – den elektroniske databasen i statsforvaltninga
• Statens Pensjonskasse informerer mellom anna om medlemskap og framtidig pensjon
• Arbeidstilsynet kan informere om arbeidsmiljølova og arbeidsrettslege spørsmål
• Statens personalhandbok

Meld frå om endringar

Dersom du får endringar i inntekt, familiesituasjon og/eller jobbsituasjon, eller skal opphalde deg i utlandet, kan det ha noko å seie for beløpet du får utbetalt frå NAV. I slike tilfelle må du derfor straks melde frå til NAV-kontoret der du bur.