Grunnstønad

Kven kan få grunnstønad?

Du kan ha rett til grunnstønad dersom du har nødvendige ekstrautgifter på grunn av varig sjukdom, skade eller lyte. Med ekstrautgifter er meint utgifter som friske personar ikkje har. Grunnstønad blir ikkje gitt til eingongsutgifter, men til utgifter som ein stadig har. Ekstrautgiftene må tilsvare minst grunnstønad sats 1.

Riktig søknad gir raskare svar

Du kan få raskare svar dersom du sjølv skaffar den informasjonen som vi treng for å behandle søknaden. Du kan inngå ein serviceavtale med ditt lokale NAV-kontoret om dette.

Søknaden sender du til NAV-kontoret der du bur.

Maksimal behandlingstid for søknad om grunnstønad er fem månader.

Kva kan du få?

Du kan få stønad til

• Drift av tekniske hjelpemiddel
• Transport
• Førarhund
• Hald av teksttelefon og i særlege tilfelle vanleg telefon
• Bruk av protesar, støttebandasjar og liknande.
• Kosthald som blir dyrare ved diett. Det må vere vitskapleg dokumentert og alminneleg godteke i medisinsk praksis at spesialdietten for den aktuelle diagnosen er nødvendig
• Slitasje på klede og sengeklede.

Grunnstønad blir gitt etter seks satsar.

Utdjupingar

Enkelte diagnosar, som til dømes cøliaki, gir rett til grunnstønad etter fastsette satsar utan nærmare dokumentasjon av ekstrautgiftene. For andre diagnosar som inneber matintoleranse og fordyra kosthald til diett, må ekstrautgiftene vurderast konkret.

Ekstrautgiftene på grunn av slitasje på klede og sengeklede omfattar også sko og støvlar. Slike ekstrautgifter kjem anten av uvanleg ofte vasking, eller at sjølve bruken fører til ekstra slitasje.

Avgrensingar

Ein får ikkje dekt utgifter til transport dersom funksjonsevna blir nedsett etter at ein fylte 70 år. Med ”ekstra” transport er meint at du må bruke annan og dyrare transport på grunn av sjukdom osv. enn andre som bur på same staden. Elles er det inga aldersgrense for å ha rett til grunnstønad.

Ein gir ikkje grunnstønad til kjøp av protesar og støttebandasjar, men til å dekkje utgifter som heng saman med bruken av desse.

Når blir pengane utbetalte?

Grunnstønaden er skattefri og blir utbetalt ein gong i månaden.